Pastoriza: “Avanzan as negociacións do convenio de ambulancias, a folga está dando resultados”

A patronal presentou unha proposta coa que non se recupera o poder adquisitivo perdido
Nacional - 05 Mar 2019

Este luns, coincidindo co inicio da terceira quenda de folga convocada no sector de ambulancias, celebrouse unha xuntanza da mesa negociadora do convenio na que, segundo avalía o responsábel do sector de Transportes da CIG, “a folga está dando resultados” porque houbo un avance nas negociacións que aínda é insuficiente, porque non se recupera o poder adquisitivo perdido que se foi acumulando nos tres anos sen convenio.

A oferta da patronal avanza até chegar a un incremento do 4% para novembro deste ano; o 3% en novembro de 2020; o 1% en xaneiro de 2021; o 1% en 2022; a metade da terceira paga extra en 2021 e enteira en 2022. Unha oferta que Pastoriza considera mellor que a anterior pero que “segue sen contemplar a recuperación do poder adquisitivo perdido desde 2015”.

O responsábel do sector de Transportes da CIG sinala ademais que a oferta cínguese ao aspecto económico e que aínda que xa se abriu o debate sobre o contrato en prácticas, aínda non se lle deu solución. Un contrato que está provocando un incremento adicional de precariedade por mor dos baixos salarios cos que as empresas pagan a estes traballadores, nun 60% inferiores aos dos compañeiros e compañeiras do sector.

Tampouco se entraron a valorar aínda as condicións laborais en cuestión de prevención de riscos. A este respecto Pastoriza reclama que se recolla a obrigatoriedade de que vaian dous traballadores/as cando haxa padiola, unha cuestión que no transporte Programado non está contemplada.

Sinala ademais que a prevención de riscos é esencial porque malia a media de idade das traballadoras e traballadores ser de entre 40-45 anos, neste sector hai un 13% de baixas, por problemas musculo-esqueléticos, cando a media en Galiza é dun 5%.

A próxima xuntanza celebrarase o día 13, data na que o responsábel da CIG agarda que continúen os avances para garantir unhas condicións salariais, laborais e sociais dignas para todo o persoal do sector e para mellorar o propio servizo. Entre mentres, a folga continúa.