Proseguen as mobilizacións das traballadoras da limpeza dos edificios municipais de Lugo
As traballadoras do servizo de limpeza das dependencias municipais do Concello de Lugo proseguiron este mércores coas mobilizacións para esixir axilidade na licitación do novo contrato e solucións a actual empresa concesionaria, Lacera, e mais ao goberno local á situación de sobrecarga laboral que sofren pola non cobertura das baixas.
Lacera está prestando o servizo de limpeza en situación de prórroga dende o ano 2016 pero négase dende hai tempo a cubrir as baixas do persoal, escudándose en que ao estar o contrato caducado non se lle aplicaron incrementos económicos e non pode afrontar o gasto das substitucións.
Isto provoca que as compañeiras teñan que asumir unha sobrecarga de traballo cada vez maior para poder prestar o servizo, que repercute na súa saúde e acaba de derivando nun maior número de traballadoras que caen enfermas.
Por iso, con estas protestas queren esixir solucións inmediatas, mais tamén demandar do Concello que axilice ao máximo a licitación do novo concurso "porque a situación actual é insostíbel".