Retómanse as protestas no Hospital de Monforte polos incumprimentos da Xerencia

Denuncian falta de persoal e contratacións precarias

Monforte -

Persoal do Hospital de Monforte retomou as mobilizacións para esixir da xerencia de xestión integrada que cumpra cos compromisos acadados o pasado ano e que puxeron final á folga convocada por CIG-Saúde, CCOO, Prosagap e UGT en demanda de máis medios humanos e materiais. Á protesta tamén se sumaron traballadores e traballadoras das ambulancias que están en folga por un convenio digno.

Dende CIG-Saúde explican que a pesar do compromiso acadado, a xerencia non está a contratar persoal TCAE para reforzar as plantas en caso de necesidade, non se incorpora un celador/a nos días de máxima actividade en cirurxía; non se cubriu a especialidade de dixestivo non se contratou persoal técnico de laboratorio para o servizo de urxencias, nin se cobren as baixas que hai en xinecoloxía e cardioloxía.

Xunto a isto, denuncian que a dirección do hospital mantén o persoal nunha situación de precariedade laboral, o que xa provocou a marcha dun médico rehabilitador debido aos contratos precarios que se lle facían. De igual xeito, subliña a CIG-Saúde de Monforte, en vez de realizarse contratos de interinidade estánselle a facer contratos cada dous meses aos/ás especialistas, ao que hai que sumar o cese da directora de enfermaría.

Ante a desidia e o desinterese da xerencia de xestión integrada para garantir unha asistencia sanitaria de calidade e para denunciar o desmantelamento progresivo do Hospital, as centrais acordaron iniciar a pasada semana un calendario de mobilizacións con concentracións todos os martes, ás 12:00 horas, na entrada do centro hospitalario, nas que animan a participar a toda a veciñanza.

Volver