As traballadoras/es dos centros de atención directa dependentes da Consellaría de Política Social continuaron esta mañá coa campaña de protestas que están a desenvolver por todo o país dende hai meses para reclamar a recuperación dos dereitos laborais recortados coa escusa da crise económica en 2012 e para esixir uns servizos de atención ás persoas 100% públicos e de calidade. O departamento autonómico ignorou en todo este tempo os chamamentos ao diálogo por parte das organizacións sindicais promotoras destas mobilizacións, polo que o conflito laboral continuará até que se atenden as súas demandas.

O persoal de TYRMA acordou este xoves en asemblea retomar as mobilizacións no mes de xaneiro se a empresa de reciclaxe de plásticos da mina de Touro non atende á demanda de retirar a modificación substancial das condicións laborais ou compensar economicamente os cambios que esta modificación provoque.