Traballadores e traballadoras do Porto da Coruña concentráronse na mañá deste venres diante do edificio da Autoridade Portuaria para demandar a implantación de protocolos de actuación para minimizar as agresións ao persoal en situacións de risco, de igual xeito que xa se están aplicando noutras administracións como as oficinas de emprego ou os centros de saúde. O comité acordou levar adiante esta protesta tras da agresión hai uns días a un traballador do porto no control de acceso ao peirao de San Diego.

O Colectivo de Xubilados/as e Pensionistas da CIG de Vigo recolleu xa máis de 1500 sinaturas para reclamar melloras na atención á dependencia, no marco da campaña que vén de poñer en marcha a central. Pola mesa informativa instalada este mércores na rúa do Príncipe pasaron unhas 700 persoas, mentres que o mércores pasado xuntaron arredor de 800 apoios na zona do Calvario.