Buscar novas
O persoal de Ambulancias do Atlántico baralla convocar folga e intensificar as protestas polos impagos
Remata sen acordo a xuntanza entre a representación sindical e a Consellaría de Sanidade ante os incumprimentos da Administración
A representación sindical da CIG, CCOO e USO en Ambulancias do Atlántico -concesionaria do servizo de transporte urxente en Vigo, Cangas e Moaña e do non urxente en toda a área sanitaria- volverá a celebrar asembleas de traballadores/as para abordar unha nova convocatoria de folga e apostará por intensificar as mobilizacións, unha vez que non está garantido o abono das nóminas de maio antes do 1 de xuño. Así o anunciaron hoxe despois da xuntanza mantida coa Consellaría de Sanidade, que rematou sen acordo polos incumprimentos da Administración.
Dende a representación da CIG na empresa explican que ademais continúan sen satisfacerse as débedas de todo o ano ao persoal traballador; non se entrega a documentación que permite interpoñer no xulgado unha reclamación de cantidades; continúa o acoso laboral; a persecución aos traballadores/as; e as carencias loxísticas afectan ao normal funcionamento do servizo. “Estamos á espera dunha resposta por parte da Xunta, que se nega en rotundo a asumir directamente o servizo de asistencia e transporte sanitario público, cambiando o modelo actual de prestación do servizo con empresas concesionarias privadas”.
Ao mesmo tempo, detallaron que a reunión mantida cos responsábeis do Sergas e do 061 “fracasou” tras incumprirse por parte da Administración os acordos alcanzados na anterior xuntanza e pola negativa a asumir novos compromisos. “Pese a que o empresario e administrador único da empresa continúa desaparecido non se presentou á reunión ningunha das persoas que ostentan actualmente a dirección da compañía, tal e como estaba previsto”. Como tampouco se entregou un organigrama da dirección, e nomeouse como interlocutor a un avogado laboralista contratado pola empresa.
De xeito que a día de hoxe o persoal descoñece a quen dirixirse “para o máis mínimo acto administrativo ou realizar tarefas loxísticas simples como pedir un permiso laboral ou solicitar a reparación dun vehículo”. Denuncian que a empresa “está sumida nun auténtico caos” sen que os empregados/as saiban a que ordes de traballo deben atender e descoñecendo que cargo ostentan as persoas que actúan na actualidade supostamente en nome do empresario Carlos Simón.
Débedas con persoal e provedores
A representación sindical de CIG, CCOO e USO censura o feito de que os documentos de nóminas continúen sen entregarse, impedindo o cálculo e a posíbel reclamación xudicial do diñeiro que se lle debe á totalidade do cadro de persoal.
O Sergas está a realizar un tímido papel de mero observador e só lanza recomendacións ao empresario e á súa contorna
Outra das cuestións que aumenta o clima de crispación é a decisión do empresario de dar indicacións para que as nóminas que si se entreguen estean feitas “deliberadamente mal” co obxectivo de colapsar os servizos xurídicos dos sindicatos, posto que terían que calcular e refacer unha a unha as nóminas de todo o ano de 260 traballadores/as. Por este motivo solicitáronlle ao Sergas que asuma a súa elaboración aproveitando o seu papel de interventor na empresa.
Mais o Sergas négase a asumir esa función, “o que demostra unha nova mentira da Consellería no seu compromiso de intervir a empresa Ambulancias do Atlántico”. Os tres sindicatos denuncian que, en realidade, a Administración está a realizar un “tímido papel de mero observador” e que tan só lanza recomendacións ao empresario e á súa contorna.
Así mesmo, as débedas a provedores continúan acumulándose, facendo moi complicado o traballo diario. Restricións de combustíbel, interrupción da limpeza dos centros de traballo e falta de reparacións nas ambulancias ou impagos de alugueres son, entre outros, algúns exemplos dos graves problemas económicos que padece a empresa, actualmente en bancarrota e que subsiste a base de adiantos económicos da facturación do Sergas.
Nula intervención da Administración
A Consellería de Sanidade aproveitou a reunión de hoxe para informar dos prazos previstos para resolver a gravísima situación actual que afecta ao servizo de transporte sanitario.
Con respecto ao servizo urxente, o vindeiro luns 13 de maio dará conta no Consello da Xunta do contrato de emerxencia para que se publiquen os pregos que permitan ás empresas licitar por un prazo de seis meses prorrogábel a outros tres máis. De maneira que, segundo as estimacións do 061, unha nova empresa estaría prestando servizo en Vigo Cangas e Moaña dende o vindeiro 1 de xuño até o 30 de novembro.
Porén a situación máis grave corresponde ao servizo programado, que segundo o manifestado na reunión o Sergas pretende continuar prestando servizo con Ambulancias do Atlántico e o seu administrador desaparecido durante como mínimo catro meses máis.
Pero o manifestado polo Sergas á representación de CIG, CCOO e USO é aínda peor, xa que teñen probas de que os cálculos de coste do servizo para unha nova licitación están mal realizados por mor da información incorrecta facilitada por Ambulancias do Atlántico, chegando incluso a incorrer novamente en falsidade documental.
As organizacións sindicais consideran que o estudo de costes publicado pola Consellería non inclúe o gasto real das nóminas do persoal nin das subministracións de material. Así, sospeitan que o contrato do servizo programado volverá a quedar deserto, tendo que prolongarse por máis tempo en mans do empresario Carlos Simón.
Acusacións da dirección do 061
A CIG, CCOO e USO manifestaron o seu malestar polas acusacións da dirección do 061 responsabilizando á representación legal dos traballadores/as “de non ter paciencia e de non respectar a paz social”, e mesmo responsabilizando as persoas traballadoras de supostos actos de sabotaxe. “Ademais, o Sergas considerara que nos atopamos nunha situación privilexiada, posto que noutras situacións semellantes ocorridas noutras areas a Administración non se implicou tanto, chegando a ter que recibir o pago das nóminas con cargo ao Fogasa pasados varios meses”.
Para as organizacións sindicais estas manifestacións non fixeron máis complicar o diálogo, poñendo fin á reunión, e acusaron a Xunta de non prestar atención ás obrigas legais que ten a administración en canto ao abono de salarios e cotas á Seguridade Social en caso de impagos pola empresa.
Tanto a CIG como CCOO e USO consideran que se o servizo se atopa actualmente en funcionamento e os pacientes están a recibir unha axeitada asistencia sanitaria é grazas á implicación e responsabilidade do persoal sanitario de Ambulancias do Atlántico, “que ten que prestar servizo nunha situación tan complicada cunha dedicación digna de admiración”. Así mesmo, fixeron responsábel á Consellería de non garantir o cobro de salarios nin os atrasos e acusaron aos seus responsábeis de realizar unha nula supervisión da xestión da empresa concesionaria.
Acoso laboral
“Mentres o persoal traballador está a respectar unha tregua durante as negociacións coa administración mantendo a paz social e mesmo chegando a desconvocar a folga prevista para o pasado 2 e 3 de maio, o empresario aproveita para aumentar o clima de crispación entre o persoal”.
Xa que a representación sindical considera demostrado que Carlos Simón está a dar indicacións dende Catalunya ao seu persoal de confianza “para que actúe a modo de vinganza perseguindo a algúns traballadores con actos que poden supoñer penas de prisión para os actuais responsábeis da empresa”. Por este motivo, estanse a preparar varias denuncias por acoso laboral, persecución, vulneración de dereitos sindicais e despedimentos que se sumarán ás xa presentadas.
A empresa de ambulancias Lucus Logística atrasa o pago das nóminas por segundo mes consecutivo
A FGAMT-CIG de Lugo-A Mariña denuncia que Lucus Logística SL aínda non abonou os salarios correspondentes ao mes de abril. Este é o segundo mes consecutivo que a empresa -que xestiona as bases de ambulancias do transporte urxente 061 Navia de Suarna, Palas de Rei, Guitiriz, Sarria, Becerreá e Pedrafita do Cebreiro- se atrasa no pago dos soldos ao seus 50 traballadores e traballadoras.
Para a FGAMT-CIG esta situación é preocupante polo incumprimento contractual co seu persoal, pola reiteración na demora do pago dos salarios máis tamén polas consecuencias que pode ter na continuidade do servizo, xa que por que se produce no marco do actual proceso de adxudicación do servizo de transporte urxente.
A CIG, aínda que non ten representación entre o persoal, insta a que se garanta o cumprimento do pagamento dos salarios de xeito periódico e puntual, segundo se recolle no convenio sectorial. E, de igual maneira, insta a Xunta de Galiza "para que se interese no seguimento desta situación no que pode ser un claro síntoma de precariedade que se poida repercutir ao servizo que deben recibir as persoas usuarias do SERGAS".
A este respecto, o secretario comarcal da FGAMT-CIG, Christian López, subliña que o persoal non pode ser quen padeza as 'vendetas' pola evolución nos concursos para o transporte sanitario urxente nin "que se permita que empresarios desta categoría sigan á fronte de empresas que sistematicamente se encamiñen a procedementos concursais ou de liquidación".
O TSXG dálle a razón a CIG-Saúde e anula a mobilidade interna voluntaria de persoal non sanitario de 2019
A Fundación Pública Urxencias Sanitarias de Galicia-061convocou en 2019 un procedemento de mobilidade voluntaria de persoal non sanitario fixo na que excluía 2 prazas do grupo administrativo da función administrativa: a da secretaría de Xerencia e a da secretaría de Dirección de Xestión e Servizos Xerais. A CIG-Saúde presentou recurso de alzada contra esta convocatoria ao considerar que non se podían excluír as prazas xa que eran de carácter básico.
Ante o silencio da administración a CIG-saúde interpuxo demanda diante do Xulgado do Contencioso administrativo nº 1 de Santiago que ditou sentenza a favor da administración, validando os argumentos desta sobre a falta de representatividade do Delegado Sindical da CIG-Saúde para presentar a reclamación, sen entrar no fondo da demanda.
A CIG-Saúde co fin de defender os seus interese e o do conxunto dos traballadores presentou recurso de apelación diante do TSXG.
O TSXG en sentenza do 17 de abril do 2024 ven de dar a razón a CIG-Saúde tanto na forma como no fondo do asunto. Así declara que o delegado sindical da CIG-saúde estaba lexitimado para presentar o recurso contra o proceso e entrando no asunto indica que a dirección do 061 non podía excluír as 2 prazas do grupo administrativo da función administrativa de carácter básico do proceso.
Sobre o argumento da dirección do 061 en relación a que as prazas excluídas poderían ser obxecto dunha convocatoria para su provisión, a través del sistema de libre designación de forma similar a como se veñen cubrindo as secretarias de Dirección en el SERGAS, o TSXG sinala que esa conversión de prazas básica a prazas de libre designación non se tiña, nin ten feito a dia de hoxe.
Finalmente, a sentenza do TSXG ordena a retrotracción del procedemento de mobilidade interna voluntaria, para incluír todos los postos vacantes.
Sanidade non garante o pago de salarios do persoal de Ambulancias do Atlántico, que irá á folga
A empresa concesionaria do 061 en Vigo, Cangas e Moaña renuncia aos contratos coa Administración e anuncia a súa intención de entrar en concurso de acredores
Na xuntanza mantida o pasado venres entre altos cargos da Consellería, Sergas e 061 coa representación do comité de folga da CIG, CCOO e USO non se garantiu o abono dos salarios pendentes ao persoal de Ambulancias do Atlántico, concesionaria do servizo de transporte urxente en Vigo, Cangas e Moaña e do non urxente en toda a área sanitaria. En consecuencia, o persoal manterá as dúas xornadas de folga previstas para os días 2 e 3 de maio se antes deste mércores día 1 non perciben os soldos que se lles adebedan.
Os responsábeis autonómicos insistiron en que “non queren oír falar” de asumir a xestión directa do servizo público de transporte sanitario e manifestaron que o pago directo das nóminas por parte da Consellería non é unha opción viábel. En todo caso, calquera solución pasa por contar con outra empresa concesionaria que asuma o servizo.
Recoñeceron que a solución proposta pola Consellería a semana pasada de adiantar o diñeiro da facturación mensual ao empresario Carlos Simón para que puidese pagar as nóminas non era xa unha opción polo perigo de que o diñeiro volvese desaparecer das contas da empresa. Algo que xa advertiran os representantes sindicais.
Polo tanto, a única saída para o Sergas é a de intervir temporalmente a empresa Ambulancias do Atlántico mentres se pon en marcha un procedemento urxente de licitación para designar unha nova concesionaria que se faga cargo do servizo.
O procedemento de intervención pública consiste no nomeamento dunha persoa como interventora que será designada polo ente público para que actúe xestionando a empresa. Este proceso xa está acordado para o servizo urxente dende o pasado luns e a previsión da Xunta é que o nomeamento se faga efectivo hoxe mesmo. Sen embargo, para o servizo programado haberá que agardar até o 6 de maio.
Perda de tempo do Sergas
Representantes do comité de folga da empresa Ambulancias do Atlántico acusaron ao Sergas de perder un tempo crucial intentando negociar co empresario Carlos Simón e a súa contorna en lugar de iniciar de inmediato a intervención pública da empresa.
Pese á renuncia oficial efectuada por Ambulancias do Atlántico a todos os contratos públicos coa Administración e aos esforzos da Consellería de Sanidade de nomear a figura dun interventor público na empresa que poida dirixir os cartos do Sergas ao abono das nóminas do persoal traballador, non existen garantías de que isto poida ser así debido a situación de insolvencia da empresa.
Representantes de CIG, CCOO e USO teñen a sospeita fundada de que en canto o diñeiro público volva entrar nas contas da empresa será automaticamente dirixido ao pago dalgún embargo dada a situación actual de quebra económica. Compre lembrar que na actualidade Ambulancias do Atlántico adebédalle dous meses á Seguridade Social e ten impagos de centos de miles de euros con entidades bancarias, empresas de renting de ambulancias, subministradoras de combustible ou compañías aseguradoras, entre outras moitas.
Nova desaparición do propietario
Durante esta semana, tanto responsables da Consellería como representantes da empresa indicaron á representación de CIG, CCOO e USO que o empresario Carlos Simón volveu “marchar” abandonando as súas responsabilidades na xerencia da empresa, deixando un poder especial para a Administración a unha traballadora e nomeando ao seu irmán e tamén empresario Óscar Simón como único interlocutor válido da empresa. O seu irmán explicou que Carlos Simón volve a estar novamente fora de Galiza e que se atopa, unha vez máis, incapacitado para calquera toma de decisións.
Óscar Simón comunicou á Consellería de Sanidade que conta co seu compromiso persoal para facilitar o proceso de transición no cambio de empresa licitadora e para garantir o abono no pago de salarios, pero matizou que en ningún caso se poderá contar co seu compromiso patrimonial para estes fins.
A nova fuxida do empresario e o cambio de interlocutor na empresa, non lle dá ningún tipo de confianza nin de garantías á representación do persoal. De feito, non fai máis que empeorar as cousas posto que o tamén empresario de ambulancias, Óscar Simón, está a ser investigado dende marzo de 2023 polos Mossos d'Esquadra e a Garda Civil e interrogado pola Audiencia Nacional no marco dunha operación anticorrupción nas ambulancias catalanas por unha suposta alteración da licitación pública en Catalunya, cando era socio do seu irmán na mesma empresa.
Folga e ultimato á Xunta
O persoal traballador de Ambulancias do Atlántico acordou o venres en asemblea que a folga convocada para os días 2 e 3 de maio non se paralizará a non ser que a totalidade das nóminas de abril estean abonadas antes do día 1 de maio, tal e como esta acordado coa empresa concesionaria.
Advirten que a situación é totalmente insostible e que de non cumprir estes prazos enfrontaranse a unha folga “dura” con mobilizacións nas que contarán co persoal doutras áreas sanitarias que xa anunciaron a súa presencia en Vigo para colaborar de forma solidaria nas protestas.
Así mesmo, a concentración prevista para o vindeiro xoves 2 de maio diante da sede do Sergas en García Barbón non se cancelará aínda que o persoal cobre as súas nóminas, posto que os incumprimentos graves en material laboral así como outras débedas económicas continúan sen resolverse.
En previsión de que o conflito se estenda no tempo, as centrais sindicais de CIG, CCOO e USO comezaron dende onte a recadar cartos entre o persoal para a creación dunha caixa de resistencia que poida paliar o impacto económico das persoas traballadoras que secunden a folga.
O persoal de Ambulancias Casablanca acorda iniciar mobilizacións ante o deterioro das condicións de traballo
Denuncian os incumprimentos da empresa, despedimentos e presións
Os traballadores de Ambulancias Casablanca, SL decidiron en asemblea iniciar mobilizacións ante os sucesivos incumprimentos e deterioro das condicións de traballo nesta empresa. As datas concretaranse nos vindeiros días, pero xa advirten que “rematarán na convocatoria dunha folga e mobilizacións en toda a UTE se non se soluciona este conflito”.
Ambulancias Casablanca forma parte dunha UTE con Ambulancias do Cantábrico (de HTC Group) e realiza o transporte sanitario non urxente da área sanitario de Santiago, dependente do SERGAS.
Segundo explica o representante da FGAMT-CIG de Compostela, Inácio Pavón, durante anos foi a acción sindical quen foi conseguindo que unha das empresas nas que peores condicións de traballo había, fora aceptando que tiña que cumprir como as demais. “Isto custou moitas horas de negociacións, pero tamén denuncias e acción sindical para que, arrastrando os pés, foran cumprindo. E unha vez máis volven deixar de lado os acordos, o que levou a esta situación e que cadro de persoal tivera dito que xa abonda”.
Por iso, esta mañá compareceron os delegados de Ambulancias Casablanca, os delegados de Ambulancias do Cantábrico e o responsable da FGAMT-CIG de Santiago para facer públicas as reivindicacións e anunciar o inicio de mobilizacións.
Sospeitas de contratación de familiares sen titulación
Pavón sinala que ás portas dun novo concurso público “atopámonos con que novamente se incumpren os acordos de contratación -polos cales se respectarían as antigüidades e se cubrirían os postos fixos con traballadores e traballadoras indefinidas- e se despide traballadores para contratar outros aos que se lles advirte que non deben de falar coa representación sindical”. Apunta que “mesmo hai sospeitas fundadas, e que serán postas nas mans da fiscalía nos próximos días, de que se contratou familiares sen titulación e que esta foi falsificada”.
O representante da FGAMT-CIG de Compostela denuncia que os traballadores despedidos fórono “por ter solicitado a limpeza dos seus uniformes”, como o resto de traballadores e como é obrigatorio por parte das empresas ao tratarse dun servizo onde existe un risco biolóxico, e “por terse afiliado ao sindicato”.
Os delegados de persoal denuncian presións por parte do encargado aos máis novos para que non rexistren as horas extras, non deixen uniformes para lavar ou se relacionen coa representación sindical. Ademais de ser habitual chamar fora das horas de traballo e cambiar permanentemente o cuadrante de traballo sen informar á representación sindical.
Sen a titulación necesaria
Tamén denuncian que os servizos UVI, que ten esta empresa na súa parte da concesión da UTE, se están a realizar servizos con traballadores sen a titulación necesaria o que é directamente ilegal e que tamén é responsabilidade do Sergas e do 061 por non levar un control sobre esta práctica fraudulenta e que pon en risco as vidas das persoas.
Outra das demandas dos traballadores é sobre o estado das ambulancias sobre as que non se realiza os mantementos nin tan sequera as limpezas adecuadas, co conseguinte risco para os traballadores e usuarios e usuarias, como un claro deterioro do servizo que se presta. “Falamos de escalóns que directamente se lles arrincan ás ambulancias porque non se reparan ou de ancoraxes de cadeiras de rodas en mal estado”, explican.
Non existe ademais no centro de traballo un espazo axeitado para a limpeza e desinfección das ambulancias tras a denuncia da veciñanza porque se estaban facendo directamente na rúa.
Seguimento maioritario na segunda xornada de folga mentres as ambulancias continúan facendo base nos cuarteis
A Inspección de Traballo inicia actuacións tras a denuncia da CIG por mor dos incumprimentos en materia de prevención
A segunda xornada de folga das ambulancias do 061 está rexistrando un seguimento maioritario entre os traballadores/as, mentres que os vehículos continúan facendo base nos cuarteis da Garda Civil. A este respecto, dende a FGAMT-CIG apuntaron que a Inspección de Traballo iniciou esta mañá actuacións, desprazándose até as bases denunciadas para comprobar as condicións nas que o persoal ten que realizar o seu traballo
A CIG, lembrou o responsábel de Transportes da central, Xesús Pastoriza, presentou denuncia na Inspección no día de onte, por mor dos incumprimentos en materia de prevención de riscos laborais que se estaba a producir, logo da orde da administración de trasladar a base das ambulancias do 061 que actúan fóra das cidades aos cuarteis da Garda Civil, sen garantir as condicións adecuadas nin para os/as traballadores/as nin para a hixienización dos vehículos.
De feito, apuntou Pastoriza, a central tivo coñecemento de que a orde da administración aos traballadores/as é que permanezan as 24 horas da quenda metidos/as dentro da ambulancia, prohibíndoselle mesmo saír para comer, e só permitindo que abandonen o dispositivo para atender o servizo ou ir ao baño, e neste caso, sempre deixando a unha persoa na ambulancia.
Neste senso, o responsábel sindical valorou que a Inspección teña iniciado xa investigacións, dadas as condicións ilegais nas que o persoal ten que facer o seu traballo e a falta de medidas de hixiene, co riso que supón tanto para os traballadores/as como para os/as doentes.
O venres continúa a folga
A folga das ambulancias do 061 continuará mañá, venres, con novos reparto de folletos informativos polos centros de saúde, mercados e principais rúas de vilas e cidades, concentracións e caravanas de vehículos.
No caso de que a patronal continúe no seu inmobilismo e non se aveña a garantir a vixencia do actual convenio galego máis alá de xullo de 2013, o persoal está chamado a continuar coa medida de presión a partir do próximo 19 de decembro, pero xa con carácter indefinido.
A administración ordena o “acuartelamento” das ambulancias do 061 durante a primeira xornada de folga no sector
A FGAMT-CIG, que presentou denuncia diante da Inspección por esta decisión, salienta o amplísimo seguimento do paro en toda Galiza
As organizacións sindicais denunciaron este mércores a orde de “acuartelamento” das ambulancias do 061 dada pola administración galega, obrigando a manter os vehículos nos recintos dos cuarteis da Garda Civil e aos traballadores/as que fan as quendas de 24 horas a ter que permanecer no interior das ambulancias nos tempos de descanso entre servizos e sen os materiais axeitados para a súa propia limpeza e a hixienización dos dispositivos. A pesares desta inédita situación, a primeira xornada de folga no sector está sendo secundada por case o cen por cen do persoal, a pesar dos abusivos servizos mínimos impostos.
O inicio da primeira xornada de folga no sector do transporte sanitario de Galiza quedaba marcado pola orde da que as ambulancias do 061 con base fóra das cidades pasaran a noite nos recintos dos cuarteis da Garda Civís, ao mesmo tempo que se mobilizaba a un importante dispositivo policial para vixiar aqueles dispositivos (como as ambulancias medicalizadas) que permaneceron nas súas bases.
Noutros casos, este “corralito” ás ambulancias fíxose nas inmediacións das casas do concello para que os vehículos permanecesen controlados pola policía local e mesmo déronse casos de ambulancias que pasaron a noite fóra dos municipios onde operan porque no seu non había cuartel da Garda Civil.
Así, segundo explica o responsábel do sector de Transportes da CIG, Xesús Pastoriza, as ambulancias de Betanzos, Vilalba, Guitiriz, Cambados, Cangas ou Moaña están facendo base nos cuarteis, mentres que en Sada foron trasladadas á Casa do Concello, en Vilagarcía á Comisaría de policía e en Ferrol ao Hospital Naval, onde o persoal “puido” durmir en cadeiras nos corredores.
Casos máis graves son os rexistrados en Oleiros, xa que a ambulancia que opera neste municipio tivo que facer base na cidade da Coruña, ou Bueu, que por non dispor de cuartel o seu vehículo foi levado a Cangas, provocando que boa parte do Morrazo quedase totalmente descuberta, xa que as dúas ambulancias das que dispón estaban en Cangas. Non cómpre esquecer tampouco que o servizo nocturno de Marín foi suprimido pola Xunta hai xa máis de un ano. Mención aparte merece o caso de Pontevedra, posto que o médico e o condutor da ambulancia medicalizada foron separados e o primeiro durmiu na base habitual mentres que o segundo tivo que facelo nun edificio da administración.
Dende a central sindical sinalouse o contraditorio que resulta esta disposición desordenada do transporte sanitario en relación aos abusivos servizos mínimos decretados, baixo o argumento de garantir a correcta cobertura do servizo: 100% de actividade para o transporte sanitario urxente, 50% en traslados inter e intrahospitalarios e en servizos programados cobertura total en oncoloxía e diálise.
A modo de exemplo da situación esperpéntica creada tras do “acuartelamento”, Ernesto López Rei, da FGAMT-CIG, referiu o caso de Betanzos, onde logo de que os gardas civís dixesen ao persoal que non tiñan espazo para acomodalo, o empresario instounos a que pediran “a ver se lles deixaban un calabozo” para pasar a noite. “É indignante que aos traballadores/as das urxencias sanitarias, que debería ser un servizo público punteiro, se lle diga que durman nos calabozos”. “Con esta decisión a Xunta estase cargando o tempo de resposta das urxencias sanitarias. A paranoia de catro gobernantes non pode facer que todo o sistema sanitario de urxencias se veña abaixo”, criticou López Rei.
Denuncia na Inspección de Traballo
Ademais, esta medida ocasiona graves trastornos no desenvolvemento das labores dos técnicos/as e os condutores do 061 –que fan quendas de 24 horas-, xa que teñen que pasar todo o tempo entre servizos dentro das ambulancias, sen un lugar acondicionado para facer os descansos, pasando frío e nin sequera con medios axeitados para mudar a roupa, lavarse e desinfectarse ou hixienizar as ambulancias adecuadamente tras atender aos/as feridos ou enfermos/as. “Isto supón un risco biolóxico claro tanto para o persoal como para as persoas que utilizan as ambulancias”, advertiu Xesús Pastoriza.
A medida adoptada pola Fundación 061 (que se supón tomada en coordinación coa Delegación do Goberno), supón unha flagrante incumprimento da lexislación en materia de prevención de riscos laborais, polos que a FGAMT-CIG cursará denuncia diante da Inspección de Traballo para que adopten as medidas oportunas.
Reivindicación de mantemento da vixencia do convenio
A folga no transporte sanitario estenderase durante o mércores, xoves e venres desta semana e a partir do 19 de decembro, se non se dá unha solución, tomará carácter indefinido. Dende a parte social, subliñou Pastoriza, con esta medida de presión só se pretende que a patronal asuma a vixencia do actual convenio até decembro de 2014, co obxectivo de negociar neste período o novo marco regulador, xa que a regresiva reforma laboral do PP limitou a ultraactividade a un ano. No caso do convenio galego (cuxo texto é do ano 2010) a vixencia rematará en xullo de 2013.
Os traballadores/as entenden que as intencións do empresariado pasan por deixar desaparecer o convenio galego e aplicar o estatal, cunhas condicións salariais e laborais moi inferiores. “Aplicar o convenio estatal significa entre 300 e 400 euros menos ao mes para cada traballador/a e a supresión doutras melloras sociais”. “O que estamos reclamando é que a mesa de negociación continúe, que se lle dea unha ultraactividade até o 31de decembro de 2014, de tal xeito que mentres se negocia un convenio novo o persoal teña a tranquilidade de que nestes dous anos non se lle van mudar as condicións de traballo”, informou.
Do mesmo xeito, dende o sector de Transportes da CIG advertiuse que coa aplicación desta rebaixa das condicións laborais, a patronal estaríalle a facer “o traballo sucio” á Xunta e a administración central, “porque poderían impor os recortes no servizo de ambulancias sen custe para as empresas e a administración, xa que todo o custe recaería nos traballadores/as”.
A CIG denuncia na Fiscalía o traslado en ambulancia dunha bebé que ía nunha incubadora atada con cinchas a unha padiola
Os traballadores da ambulancia, que se negaron a facer a viaxe nestas condicións irregulares e inseguras, foron ameazados co despedimento
Os feitos, explicaron o responsábel de Saúde Laboral da FGAMT-CIG, Ernesto López, e o condutor da ambulancia, Néstor Torea, aconteceron o pasado 25 de setembro, cando aos traballadores de Ambulancias Xuvias (que ten a concesión do servizo altas e traslados inter e intrahospitalarios do CHUAC) lles foi asignado un servizo de transporte dunha bebé prematura en incubadora.
Foi entón cando o persoal se deu conta de que terían que facer o traslado coa incubadora atada cunha cincha enriba dunha padiola e co sistema de monitorización suxeitado con esparadrapo. Antes estas manifestas irregularidades e faltas de seguridade para a crianza, o propio Torea manifestou ao persoal médico que se negaba a facer o traslado ante as serias posibilidades de que a incubadora case no chan, pondo en risco a saúde do cativo.
A este respecto, o condutor da ambulancia lembra que, segundo a normativa de transporte sanitario, para realizar o traslado duna xeito seguro a incubadora ten que estar ancorada á padiola con instrumentos de suxeición e ancoraxe homologados, condicións que si cumpría a ambulancia na que a meniña fixo a viaxe entre o hospital de Vigo e o da Coruña.
Ante a negativa dos traballadores/as a realizar o servizo en tales condicións de inseguridade, o persoal médico do Materno aseguroulles que ían dar parte á empresa, ameazándoos con que poderían ser despedidos. Nese momento, os dous traballadores/as chamaron a Garda Civil para dar conta desta situación e ao 061, e aínda que se recoñeceu que esas condicións non eran as adecuadas, deixaron a responsabilidade do que puidese pasar en mans do persoal médico que ordenou o traslado.
Tanto López Rei como Torea matizaron que este tipo de traslados non son illados, senón que se realizan con frecuencia e criticaron que tanto dende a Xerencia do CHUAC como dende a empresa concesionaria do servizo –ambos coñecedores desta situación- non se teñan tomado medidas para resolver estas carencias e acondicionar adecuadamente e con suxeición á lexislación vixente os dispositivos para o transporte sanitario destas características.
Neste senso, o responsábel de Transportes da CIG na Coruña lembrou as palabras do Fiscal de Seguridade Viaria cando hai uns meses asegurou que o ministerio fiscal imputaría por homicidio imprudente a todos os pais e nais que se visen implicados nun accidente e os/as fillos/as non fosen correctamente suxeitos. “Este non é un traslado nun vehículo particular, pero é o mesmo esquema, a crianza ten que ir na ambulancia ben suxeita e en condicións de seguridade e non con este amaño artesanal que o único que fai é por en perigo ao/á cativo e máis ao condutor e ao padioleiro”.
Antes as portas da Audiencia Provincial, López Rei explicou a que a nai da cativa afectada tamén presentou reclamación diante do Sergas para que faga as investigacións oportunas e corrixa estas deficiencias.
Xabier Aboi demanda que se adopten medidas contra Farjas polas consecuencias dos recortes no servizo de ambulancias en Marín
O deputado do BNG, Bieito Lobeira, presenta os datos oficiais da Consellaría de Sanidade, onde se reflicten os tempos de tardanza na resposta a emerxencias
O responsábel comarcal da FGAMT-CIG de Pontevedra, Xabier Aboi, comparecía en rolda de prensa acompañado polo deputado do BNG, Bieito Lobeira, para avaliar as consecuencias dos atrasos nos tempos de resposta da ambulancia de Marín, logo de ter sido recortado o servizo de ambulancias por decisión da consellaría de Sanidade. O deputado nacionalista aclarou que os datos foron proporcionados pola propia consellaría, logo de seren demandados en sede parlamentaria polo BNG.
Segundo Aboi, estes datos constatan que os atrasos son cada vez máis considerábeis. De feito, o 19 de setembro, tras saltar unha alarma no servizo de emerxencias ás 21:48 horas, a ambulancia de Marín, que foi desviada a Pontevedra ás 21.30 horas por orde da Consellería, estaba inmobilizada e tivo que vir a de Pontevedra, que tardou 24 minutos en atender ao doente cando “se estivera en Marín, estaría en 2 minutos” porque a alarma produciuse a carón da base da ambulancia.
O responsábel comarcal da FGAMT denuncia que, segundo os datos aportados pola consellaría, a media de resposta é de entre 19 e 26 minutos, o que “provoca que non se atenda adecuadamente á xente”.
Do mesmo xeito, na noite do 24 ao 25 de setembro, coincidindo coa celebración en Marín da festividade de San Miguel, “entre as 3 e as 4 da madrugada non houbo ambulancias na comarca de Pontevedra, que quedou desatendida, porque estaban todas en Marín. Si había ambulancias, pero as unidades estaban apagadas na base”.
Dos datos proporcionados pola Consellaría tamén se desprende que entre o día 28 ás 8:04 horas foi activada unha alerta no centro de control de emerxencias 061, non sendo atendido o paciente até as 8:23 horas. “Lamentabelmente a persoa morreu, non sabemos a causa nin se esta persoa seguiría con vida , pero si que a ambulancia tardou máis ao ter que vir de Pontevedra”.
O día 29 de setembro ocorreu algo semellante. Ás 5:03 horas activouse outra alerta que foi atendida ás 5:22. A conclusión é que, segundo os cálculos de CIG e BNG, o tempo medio de resposta, pola noite, é de até 18 minutos.
Cinco mortos por distintas circunstancias
Segundo as informacións das que dispoñen Lobeira e Aboi, a estas alturas irían xa cinco persoas mortas, por distintas circunstancias. “Non sabemos se o resultado tería sido o mesmo se os tempos de resposta fosen inferiores, pero si é verdade que é imposíbel que a ambulancia tarde o mesmo estando en Pontevedra que estando en Marín”.
Diante desta situación, o deputado nacionalista anunciou que o BNG solicitará a comparecencia da conselleira para explicar este asunto no Parlamento. Lobeira considera “surrealista” que se persiga a quen “defende a sanidade pública” e non se intente solucionar o problema que está provocando o recorte do servizo de ambulancias en Marín. Un recorte xustificado, dixo, polas supostas políticas de “austeridade”, que pon en xogo a “saúde da xente”.
Para o responsábel comarcal da FGAMT, é de especial gravidade que ante esta situación a consellaría presentara unha denuncia contra Xabier Aboi e contra a CIG, por facer públicas as deficiencias dun servizo básico, no canto de adoptar medidas contra quen ten a responsabilidade de recortalo. “O normal é que a procesada fose Pilar Farjas”, afirma.
Aboi foi chamado a declarar por un presunto delito de revelación de segredos, nunha rolda de prensa na que denunciou os recortes nos servizos de emerxencias públicos e as súas consecuencias.
Convócase unha manifestación contra o desmantelamento do Hospital do Salnés
Terá lugar o venres día 7 de outubro ás 20:30 horas, con saída da Casa do Mar en Vilagarcía
A Plataforma en Defensa da Sanidade Pública do Salnés, na que está integrada a CIG, vén de convocar unha manifestación para o vindeiro venres día 7 de outubro, ás 20:30 horas, en Vilagarcía, baixo o lema “O Salnés: Área Sanitaria propia. Non ao desmantelamento do Hospital”.
A Plataforma lembra que a existencia da Área Sanitaria do Salnés implica a dotación de todos os servizos que isto conleva, desde a atención primaria até a xestión do Hospital do Salnés. Por iso denuncia que o decreto que vén de sacar a Xunta de Galiza, deixa sen contido e valeira o control de todo o referente á Área sanitaria, pasando a depender, como anos atrás, do Complexo Hospitalario de Pontevedra (CHOP).
Este decreto, explican, implicará deixar de facer investimentos e de prestar servizos na comarca, dedicando todos os investimentos á construción do novo hospital de Pontevedra en Monte Carrasco, coa xestión privada do mesmo. “A Xunta, no que eles chaman ‘reorganización’ está a eliminar as ambulancias do 061 de transporte urxente, co que iso significa. Con esta política está a deteriorar todos os aspectos da sanidade pública”.
Deficiencias
Alén diso, salientan as deficiencias que ten o Hospital do Salnés, no que se terían que facer investimentos en cardioloxía, ampliación de urxencias, especialidades, quirófanos e máis camas, entre outras.
Por iso demandan unha área e xestión propias, que significa que se ten en conta a dimensión das deficiencias de atención primaria nos concellos da área sanitaria (Vilagarcía de Arousa, Cambados, Catoira, A Illa de Arousa, Vilanova de Arousa e Ribadumia): pediatría, máis médicos ou máis centros de saúde en Vilagarcía de Arousa...
A plataforma entende que a aplicación do decreto supón o abandono do Hospital, por iso exixen a súa retirada e derrogación, que se efectivicen os investimentos comprometidos desde hai anos, para paliar as deficiencias actuais e as ampliacións futuras e unha atención primaria con instalacións e servizos de calidade.
I feel so free!