Buscar novas
O persoal de Ambulancias Casablanca acorda iniciar mobilizacións ante o deterioro das condicións de traballo
Denuncian os incumprimentos da empresa, despedimentos e presións
Os traballadores de Ambulancias Casablanca, SL decidiron en asemblea iniciar mobilizacións ante os sucesivos incumprimentos e deterioro das condicións de traballo nesta empresa. As datas concretaranse nos vindeiros días, pero xa advirten que “rematarán na convocatoria dunha folga e mobilizacións en toda a UTE se non se soluciona este conflito”.
Ambulancias Casablanca forma parte dunha UTE con Ambulancias do Cantábrico (de HTC Group) e realiza o transporte sanitario non urxente da área sanitario de Santiago, dependente do SERGAS.
Segundo explica o representante da FGAMT-CIG de Compostela, Inácio Pavón, durante anos foi a acción sindical quen foi conseguindo que unha das empresas nas que peores condicións de traballo había, fora aceptando que tiña que cumprir como as demais. “Isto custou moitas horas de negociacións, pero tamén denuncias e acción sindical para que, arrastrando os pés, foran cumprindo. E unha vez máis volven deixar de lado os acordos, o que levou a esta situación e que cadro de persoal tivera dito que xa abonda”.
Por iso, esta mañá compareceron os delegados de Ambulancias Casablanca, os delegados de Ambulancias do Cantábrico e o responsable da FGAMT-CIG de Santiago para facer públicas as reivindicacións e anunciar o inicio de mobilizacións.
Sospeitas de contratación de familiares sen titulación
Pavón sinala que ás portas dun novo concurso público “atopámonos con que novamente se incumpren os acordos de contratación -polos cales se respectarían as antigüidades e se cubrirían os postos fixos con traballadores e traballadoras indefinidas- e se despide traballadores para contratar outros aos que se lles advirte que non deben de falar coa representación sindical”. Apunta que “mesmo hai sospeitas fundadas, e que serán postas nas mans da fiscalía nos próximos días, de que se contratou familiares sen titulación e que esta foi falsificada”.
O representante da FGAMT-CIG de Compostela denuncia que os traballadores despedidos fórono “por ter solicitado a limpeza dos seus uniformes”, como o resto de traballadores e como é obrigatorio por parte das empresas ao tratarse dun servizo onde existe un risco biolóxico, e “por terse afiliado ao sindicato”.
Os delegados de persoal denuncian presións por parte do encargado aos máis novos para que non rexistren as horas extras, non deixen uniformes para lavar ou se relacionen coa representación sindical. Ademais de ser habitual chamar fora das horas de traballo e cambiar permanentemente o cuadrante de traballo sen informar á representación sindical.
Sen a titulación necesaria
Tamén denuncian que os servizos UVI, que ten esta empresa na súa parte da concesión da UTE, se están a realizar servizos con traballadores sen a titulación necesaria o que é directamente ilegal e que tamén é responsabilidade do Sergas e do 061 por non levar un control sobre esta práctica fraudulenta e que pon en risco as vidas das persoas.
Outra das demandas dos traballadores é sobre o estado das ambulancias sobre as que non se realiza os mantementos nin tan sequera as limpezas adecuadas, co conseguinte risco para os traballadores e usuarios e usuarias, como un claro deterioro do servizo que se presta. “Falamos de escalóns que directamente se lles arrincan ás ambulancias porque non se reparan ou de ancoraxes de cadeiras de rodas en mal estado”, explican.
Non existe ademais no centro de traballo un espazo axeitado para a limpeza e desinfección das ambulancias tras a denuncia da veciñanza porque se estaban facendo directamente na rúa.
A CIG-Saúde denuncia o incumprimento, unha vez mais, do contrato de servizo de transporte sanitario aéreo do 061
O helicóptero con base en Santiago estará inoperativo do 15 ao 19 de abril
A CIG-Saúde vén de denunciar que o helicóptero medicalizado con base en Santiago H3 está inoperante dende onte luns 15 de abril, ás 13:00 horas, e que non se agarda que volva estar operativo até o venres día 19 deste mes. Aínda que os pregos do servizo establecen que a empresa adxudicataria debe dispor dun aparello de substitución, ELIANCE HELICOPTER GLOBAL SERVICES, S.L. non vai cumprir está cláusula dos pregos.
A CIG-Saúde sinala, ademais, que está inoperatividade non está causada por un imprevisto senón que se trata dunha intervención programa para a instalación dunha caixa de comunicación que os pregos establecen como obrigatoria.
Esta situación dáse no marco temporal de cambio de contrato do servizo de transporte sanitario urxente aéreo da FPUSG-061. O novo contrato foi formalizado o pasado 18 de marzo 2024, despois de que a primeira licitación quedará deserta e se volvera a licitar o mesmo servizo por 3 millóns mais de euros.
O aparello en cuestión chegou á base de Santiago en febreiro coa intención de quedar xa para prestar servizo co novo contrato, pero estivo inoperante debido a que non había espazo suficiente no asento do persoal médico. Ademais desta deficiencia, o aparello presentaba outras que quedaron pendentes de arranxar, unha delas a instalación de unha caixa de comunicacións.
Ademais do propio incumprimento do contrato, esta circunstancia supón un prexuízo para os usuarios e usuarias do Servizo Galego de Saúde que quedarán privados deste medio de atención ás emerxencias durante 4 días.
Agardase que o mesmo ocorra co helicóptero con base en Ourense en próximas datas.
A CIG denuncia que Lucus Logística aínda non abonou a nómina de marzo ao seu persoal
A CIG denuncia que a empresa Lucus Logística SL, que se encarga da xestión das bases de ambulancias do servizo de transporte urxente do 061 das localidades de Navia de Suarna, Palas de Rei, Guitiriz, Sarria, Becerreá e Pedrafita do Cebreiro non lles abonou aínda aos seus 50 traballadores e traballadoras a nómina do mes de marzo.
Para o secretario da FGAMT-CIG de Lugo-A Mariña, Christian López, esta noticia resulta preocupante polo incumprimento contractual e polas derivacións e implicacións "que poidan ter as persoas representantes desta empresa" no actual proceso de adxudicación do servizo do transporte sanitario urxente.
Por iso, a CIG insta a que se garanta o pago dos salarios periodica e puntualmente, e que se cumpra co recollido no convenio sectorial. E de igual xeito, insta a Xunta de Galiza para que se interese no seguimento desta situación de precariedade na prestación do servizo "que pode repercutir na calidade do servizo que deben recibir as persoas usuarias do SERGAS"
O persoal do 061 e do servizo de ambulancias non urxente de Vigo denuncia atrasos nas nóminas
A representación sindical comunicaralle á Xunta a situación da empresa e reclamará a xestión directa por parte da Consellaría
O persoal da empresa Ambulancias do Atlántico, actual concesionaria do 061 en Vigo, Cangas e Moaña e que tamén presta o servizo de transporte sanitario dos hospitais para toda a área sanitaria de Vigo, denunciou este venres perante a Inspección de Traballo que leva un ano enteiro acumulando atrasos no abono dos seus salarios.
A situación vén de complicarse máis despois de que o persoal sanitario afectado (250 traballadores/as) cobrase a paga extra de marzo unha semana máis tarde do establecido e sobre todo porque na actualidade aínda non cobraron a mensualidade de marzo, incumpríndose así o acordo coa empresa que obriga a facelo antes do último día de cada mes.
Neste contexto, o empresario catalán Carlos Simón García atópase desaparecido e en paradeiro descoñecido. "Non se presenta na empresa, non contesta os requirimentos da representación do persoal, non atende os correos nin as chamadas e non comparece nas reunións de xestión".
Froito desta situación, a recentemente designada directora de recursos humanos abandonou a empresa sen se presentar ao traballo dun día para outro, e o director da compañía está de baixa médica. Por estes motivos, o propio persoal traballador que aínda non cobrou é o encargado de xestionar integramente o funcionamento da empresa.
A representación sindical de CIG, CCOO e USO foi atendida pola inspectora de Traballo que levará o caso, que dada a urxencia e gravidade da situación comprometeuse a intentar localizar ao empresario para esixir a súa comparecencia urxente.
Problemas económicos
Pese a que o 061 ven de incrementar en máis de 800.000 euros anuais o importe da licitación a Ambulancias do Atlántico e que esta mesma empresa conta tamén coa concesión dos hospitais de Vigo, a adxudicación do servizo sanitario da Volta Ciclista a España, o Centro Penitenciario da Lama, o seguro de saúde Adeslas e o hospital Rivera Povisa, os atrasos nos pagos ao seu persoal sanitario e aos provedores son continuos.
A difícil situación económica que semella atravesar a empresa vai en aumento, xa que esta mesma semana as tarxetas de pago que se empregan para a repostaxe das ambulancias deixaron de funcionar e tan só se pode acudir á gasolineira de Repsol da Avenida de Madrid por un suposto compromiso de Carlos Simón de pagar nun futuro o que se vai acumulando.
Ademais dos problemas económicos a empresa suma denuncias na Inspección, e mesmo vén de ser sancionada pola utilización de ambulancias asignadas a un contrato coa Administración pública na realización de servizos privados. O último incumprimento do que se ten constancia é o de entregar documentación con información falsa para o concurso do actual servizo do 061.
Xestión directa da Consellaría
Hoxe mesmo a representación sindical de CIG, CCOO e USO comunicaralle oficialmente a situación da empresa tanto ao Sergas como ao 061. No escrito solicitarán formalmente que se execute o aval depositado polo empresario Carlos Simón nos contratos que ten coa Administración para que o servizo pase a ser asumido directamente pola Xunta de Galiza e que sexa a Consellaría de Sanidade a que abone os salarios ao persoal sanitario que continúa sen cobrar.
A Xunta saca a concurso o servizo de ambulancias urxente e a metade dos lotes quedan desertos por estar infradotados economicamente
CIG, CCOO, UGT e USO non descartan mobilizacións polas consecuencias laborais e sociais
A Xunta sacou a concurso, o pasado mes de decembro, a concesión do servizo de transporte sanitario urxente do 061 (ambulancias). A baixa dotación económica, que impide o cumprimento do convenio colectivo e a prestación do servizo en condicións axeitadas, provocou que dos 13 lotes que se licitaban, 5 quedaran desertos ao non se presentar nin unha soa oferta. Por iso esta mañá CIG, CCOO, UGT e USO compareceron en rolda de prensa para denunciar a gravidade da situación e advertir que, de non se resolver, o sector iniciará mobilizacións.
Tal e como explicou o responsábel do sector de Transporte da FGAMT-CIG, Xesús M. Pastoriza, a situación é tanto máis grave canto que eses cinco lotes se corresponden con toda a provincia de Pontevedra e a comarca da Coruña, precisamente as zonas máis poboadas de Galiza. E isto ocorreu co transporte sanitario urxente, porque segundo apuntou, o non urxente aínda non saíu a concurso.
Para Pastoriza a responsabilidade é do PP e da Xunta de Galiza, que no verán de 2023 anunciaron publicamente que “sacarían un extraordinario concurso con moitos recursos” á altura de setembro ou outubro pero “estamos en febreiro de 2024 e a metade do urxente quedou deserto”.
Por iso considerou que “é moi evidente que toda esa marabilla que ía traer a Xunta de Galiza non se concretou en ningunha realidade”. Lembrou que desde o sector xa se viña denunciando que os anteriores contratos estaban infradotados economicamente e agora “os novos contratos igual”.
Nese sentido indicou que “hai unha pequena suba” pero “claramente insuficiente” e denunciou o “secretismo” da Xunta, que non deu nin unha soa explicación ao respecto.
Cumprimento do convenio
Para as organizacións sindicais é especialmente preocupante esta situación, xa que unha parte moi importante da negociación colectiva está vinculada á licitación pública. Isto é, para que se poidan aplicar os incrementos salariais e de melloras de condicións laborais pactadas no V Convenio do sector de ambulancias, o concurso ten que estar suficientemente dotado e contar cos recursos económicos necesarios para cumprilo. Ademais, ao non se asinar en tempo os novos contratos, queda no aire o pagamento das cantidades que se deberían de abonar xa entre abril e xuño deste ano.
Canto ás condicións laborais outra das denuncias que viñan facendo, e que persiste, é o exceso de carga de traballo. A este respecto Pastoriza denunciou que nos pregos, o 061 volveu incluír ambulancias cun só técnico-condutor/a. Un déficit de persoal que ten consecuencias porque ao non poder mobilizar ás e os doentes, ten que chamar a outra ambulancia que non pode, así, atender outra emerxencia. E isto ocorre cando “as ambulancias cada vez traballan máis”.
Xunto a isto denunciaron que, precisamente por ese exceso de carga de traballo, este é o sector que acumula máis baixas laborais relacionadas con problemas músculo-esqueléticos.
Alén da falta de persoal denunciaron tamén a falta de ambulancias para poder garantir o servizo e afirmaron que, por exemplo, na área de Vigo operan tamén as ambulancias do Baixo Miño e na área da Coruña as de Carballo, ao igual que ocorre noutras áreas “tapando un furado con outro”, denunciou o representante da CIG.
A conclusión para os representantes sindicais é que, para garantir a calidade do servizo de ambulancias do 061 en Galiza, sería preciso incrementar a dotación económica dos concursos por riba do 20%, fronte a incrementos como os contemplados nos pregos para áreas como a de Santiago, que “foi do 1,8%, que non é nin o IPC”. Só así consideran que se podería dotar de máis e mellores medios e garantir condicións laborais dignas para o persoal.
As organizacións sindicais instan á patronal de ambulancias e Sanidade a abrir unha mesa de negociación a tres bandas
Os traballadores/as irán a folga de xeito continuado entre o 25 de febreiro e o 5 de marzo
De feito, o responsábel de Transportes da CIG, Xesús Pastoriza, aseveraba que a reunión coa Consellaría “non valeu para nada” xa que non ten interese en implicarse na problemática laboral, analizar a situación dos traballadores/as ou asumir o seu papel de mediador para tentar buscar unha saída.
No transcurso do encontro, dende as organización sindicais expúxoselle á Consellaría de Sanidade á situación de” maltrato físico e moral” que a patronal está a aplicar aos traballadores/as, xa que durante os días de folga obriga ao persoal en servizos mínimos a pasar a xornada dentro da ambulancia “como se fosen un elemento máis do vehículo, un volante ou un asento”, criticou Pastoriza.
O responsábel de Transportes da CIG tamén matizou que dende Sanidade desmentiron os argumentos utilizados polas empresas para bloquear as demandas da parte social, como por exemplo que é a administración quen prohibe consignar unha paga extraordinaria máis. Ante estas informacións contraditorias, dende os sindicatos pediron que se abrise unha mesa negociadora a tres bandas (patronal, administración e representación do persoal), pero non lograron tirar ningún compromiso firme neste sentido.
Así as cousas, os traballadores/as acordaron suspender a folga de xoves e venres que mantiñan dende o pasado 10 de xaneiro e teñen convocada unha nova folga consecutiva entre o 25 de febreiro e o 5 de marzo, co obxectivo de dar un pulo decisivo para resolver o conflito.
Os traballadores/as das ambulancias do 061 continúan este xoves e venres coa folga polo convenio colectivo
O persoal decidirá en asemblea se modifica o calendario de mobilizacións
Os traballadores e traballadores das ambulancias do 061 continuarán mañá xoves e o venres coas xornadas de folga (e xa van 12 días) en demanda dun compromiso da patronal para manter a vixencia do actual convenio colectivo até finais do ano 2014, mentres se negocia o novo marco normativo.
Ante as informacións aparecidas este mércores na prensa, o responsábel de Transportes da CIG, Xesús Pastoriza, quixo aclarar que as organizacións sindicais van propor unha modificación do calendario de folgas, que aínda terá que ser sometido á vontade das asembleas de traballadores/as que se celebrarán en todas as comarcas mañá xoves, ás 21:00 horas.
Porén, Pastoriza matizou que a posibilidade de modificar o calendario de mobilizacións foi abordada polas organizacións sindicais previamente á chegada da proposta da patronal vía Consello Galego de Relacións Laborais e antes de coñecerse sequera a súa existencia, polo que as decisións que se tomen non terán nada a ver coa comunicación da parte empresarial.
O calendario que mañá levarán a aprobación das asembleas consiste en suspender á folga entre os días 2 e 24 de febreiro e retomar a folga de xeito continuado durante unha semana entre o 25 de febreiro e o 4 de marzo. A partir desa data estudaranse novas accións. En todo caso, Pastoriza recalcou que a decisión de suspender os paros, se é que así o aproban os traballadores/as, non veu motivada pola petición da parte empresarial, que xunto coas propostas enviadas aos sindicatos, puña como condición para seguir negociando o levantamento da folga.
A respecto das ofertas achegadas pola patronal, o responsábel de Transportes da CIG considera que pouco varían das xa presentadas nas mesas de negociación. Porén matizou que, seguindo o estilo da patronal, as organizacións sindicais remitiron un escrito ás empresas a través do Consello Galego, instándoas a sentar a negociar “porque a nosa resposta terana onde corresponde, que é na mesa de negociación do convenio, e non a través dun escrito”.
O persoal das ambulancias do 061 encara o oitavo día de folga cunha patronal instalada no inmobilismo
O sector de Transportes da CIG critica a falta de vontade das empresas para manter unha vía de diálogo e o total desinterese da administración galega
Traballadores e traballadoras do transporte sanitario urxente desenvolven este xoves a oitava xornada de folga no sector en demanda dun compromiso da patronal para manter a vixencia do actual convenio colectivo até finais do ano 2014, mentres se negociar o novo marco normativo.
O responsábel de Transportes da CIG, Xesús Pastoriza, destacou o maioritario seguimento que están a ter as xornadas de paro, a pesar de que esta xoves se cumpre xa o oitavo día de folga. Cómpre lembrar que o pasado mes de decembro, o persoal xa tivo cinco xornadas de paros e dende o 10 de xaneiro, a folga realízase cada xoves e venres con carácter indefinido.
Pastoriza criticou que a pesar do éxito da medida de presión, a patronal está instalada nun inmobilismo absoluto e non mantén ningunha vía de contacto coa representación sindical. “A patronal presentou a súa proposta e díxonos que ou a aceptábamos ou non había máis negociación. Así que teremos que seguir coas mobilizacións”, advirte.
Do mesmo xeito, o responsábel de Transportes da CIG critica o desinterese do Sergas por buscar unha solución ao conflito, inhibíndose no seu papel de mediador “como vén sendo habitual e mesmo consideramos que está apoiando claramente a parte empresarial”.
Reclamación da vixencia do convenio
Dende a parte social, subliñou Pastoriza, con esta medida de presión só se pretende que a patronal asuma a vixencia do actual convenio até decembro de 2014, co obxectivo de negociar neste período o novo marco regulador, xa que a regresiva reforma laboral do PP limitou a ultraactividade a un ano. No caso do convenio galego (cuxo texto é do ano 2010) a vixencia rematará en xullo de 2013.
Os traballadores/as entenden que as intencións do empresariado pasan por deixar desaparecer o convenio galego e aplicar o estatal, cunhas condicións salariais e laborais moi inferiores. “Aplicar o convenio estatal significa entre 300 e 400 euros menos ao mes para cada traballador/a e a supresión doutras melloras sociais”. “O que estamos reclamando é que a mesa de negociación continúe, que se lle dea unha ultraactividade até o 31de decembro de 2014, de tal xeito que mentres se negocia un convenio novo o persoal teña a tranquilidade de que nestes dous anos non se lle van mudar as condicións de traballo”, informou.
Do mesmo xeito, dende o sector de Transportes da CIG advertiuse que coa aplicación desta rebaixa das condicións laborais, a patronal estaríalle a facer “o traballo sucio” á Xunta e a administración central, “porque poderían impor os recortes no servizo de ambulancias sen custe para as empresas e a administración, xa que todo o custe recaería nos traballadores/as”.
Os traballadores/as de ambulancias acordan suspender a folga indefinida e convocar paros intermitentes os xoves e venres
A medida de presión aplicarase a partir do 10 de xaneiro, á espera de que a patronal volva á mesa de negociacións
A FGAMT-CIG cualificou de rotundo éxito o seguimento de todas as xornadas de folga desenvolvidas até o de agora (tres días a pasada semana e dous nesta), xa que foi secundada por practicamente a totalidade dos traballadores/as que non estaban asignados a servizos mínimos.
Pola contra, o responsábel de Transportes da CIG, Xesús Pastoriza, criticou a actitude mantida pola patronal, xa que alén de non comprometerse a manter a vixencia do convenio até decembro de 2014, esta mesma semana rompeu de xeito unilateral as conversas, abandonando a mesa negociacións.
Co obxectivo que manter abertas as vías de diálogo, as organizacións sindicais tiveron unha xuntanza co Sergas o xoves pola mañá para solicitar a implicación da administración no conflito. Neste sentido, o servizo galego de saúde entendeu a necesidade de dar continuidade ás negociacións, polo que se comprometeu a falar coa patronal de ambulancias para instar ás empresas a volver á mesa.
Á espera do que aconteza nas vindeiras semanas, os traballadores/as están chamados a retomar os paros todos os xoves e venres a partir do 10 de xaneiro.
A terceira xornada de folga nas ambulancias remata coa patronal instalada no inmobilismo
O persoal retomará os paros, con carácter indefinido, a partir do 19 de novembro, se non se producen avances
Os traballadores e traballadoras das ambulancias do 061 desenvolveron este venres a última das tres xornadas de folga convocadas para esta semana e, aínda que a patronal mantén o seu inmobilismo, dende a FGAMT-CIG fíxose un balance moi positivo da resposta dada polo conxunto do sector, superando mesmo as expectativas das organizacións sindicais.
A este respecto, dende o sector de Transportes da CIG subliñaron o forte impacto desta folga, e mesmo resaltaron o feito de que aqueles traballadores/as que estaban de servizos mínimos ían identificados con autocolantes para amosar o seu apoio ao paro.
Pola súa banda, a patronal mantense na súa posición inmobilista, mentres dende as organizacións sindicais recordaron que a folga se convocou co único obxectivo de que o empresariado se comprometa a manter a vixencia do convenio colectivo galego até decembro de 2014 para nese período negociar un novo marco regulador coa garantía de que nin as condicións laborais nin as salariais se verán rebaixadas. “Asumimos pasar estes dous anos coas condicións salariais de 2010, pero tendo a garantías de que non vai desaparecer o convenio galego”, matizaba Ernesto López Rei.
Dende a FGAMT-CIG reiterouse que os traballadores/as están dispostos a loitar e non teñen intención de volver ás condicións laborais que había no ano 2000. Deste xeito, de non darse un paso por parte da patronal, o vindeiro 19 de decembro o persoal retomará a folga, pero cun carácter indefinido.
No día de hoxe, os traballadores/as levaron polas rúas de vilas e cidades as súas reivindicacións, con concentracións nos centros de saúde e hospitais, caravanas de vehículos ou reparto de folletos informativos entre a cidadanía.
I feel so free!