Buscar novas
Representantes do 061 e 112 denuncian o “despilfarro” derivado de “deslocalizar” estes servizos de Compostela á Estrada
Constituíron unha Plataforma e manterán as mobilizacións mentres non obteñan unha explicación satisfactoria que xustifique o traslado ou este se paralice
Até o de agora o 061 e o 112 operaban en dependencias cedidas pola CRTVG en San Marcos. En breve, aínda que carecen de máis información que a que se publica nos medios de comunicación, todo o operativo terá que trasladarse a un novo edificio na Estrada. Un traslado que afectará a 300 traballadoras e traballadores directamente, mais tamén ás súas familias.
Diante desta situación, veñen demandando, desde hai meses, a paralización dunha decisión que a presidenta do Comité do 112, Isabel Moares, atribuíu a “razóns políticas” e denunciando os custos que terá para as arcas públicas.
Hoxe anunciaban ademais que veñen de constituírse en Plataforma para unir forzas, demandas e convocar mobilizacións conxuntas. Neste sentido, ademais dos actos informativos-reivindicativos que xa se teñen realizado, están desenvolvendo unha campaña de recollida de sinaturas que, segundo aseguraron, está a ter unha moi boa acollida entre as e os composteláns.
Para Jorge Puente, representante da Xunta de Persoal do 061, a decisión adoptada polas consellarías de Presidencia, da que depende o 112, e de Sanidade, da que depende o 061, é “arbitraria” e carece de “xustificacións técnicas ou económicas”.
Moi á contra Puente denuncia que suporá un gasto engadido para a administración e que esta non foi aínda quen de explicar por qué hai que trasladar estes servizos á Estrada, malia ter solicitado numerosas xuntanzas nas que obtiveron como única resposta que “non hai marcha atrás”.
Só o edificio tivo un custo de 12 millóns de euros
Neste sentido Moares lembrou que en 2014 estaba previsto un gasto de 6 millóns no edificio que aloxará estes dous servizos. Un orzamento inicial que xa vai, a esta altura no dobre, 12 millóns de euros.
Xunto a isto denunciou que o traslado do operativo do 061 terá un custo calculado en 1 millón de euros, e que este ascenderá aos 1,7 millóns no caso do do 112.
A presidenta do comité do 112 denunciou ademais que o persoal das centrais de chamadas tanto do 112 como do 061 está subcontratado baixo o convenio de Contact Center, en condicións moi precarias, e que todos eses custos derivados de levar os servizos de Santiago á Estrada “recaerán sobre nós”.
A este respecto, Araceli Nine, presidenta do comité de operadores/as do 061 engadiu que aos gastos xa realizados no edificio hai que engadir os gastos de mantemento, cuantificados inicialmente nos 300.000 € ao ano, pero que agora xa se calcula que poderían chegar aos 600.000.
“En lugar de gastar os cartos de todas e todos así, debían destinalos a salvar vidas”, asegurou Nine, quen subliñou que “os edificios non salvan vidas, son as persoas”, en referencia ás traballadoras e traballadores tanto do 112 como do 061.
Por iso demandou que se poña “sentido común” e que, en vez de “despilfarrar” levando os operativos da capital de Galiza para a Estrada, se destinen os cartos en mellorar as condicións laborais do persoal. “Temos un contrato de televenta, cando estamos sometidas a un alto nivel de estrés e de responsabilidade”.
Polo de agora solicitaron unha xuntanza conxunta coas consellarías de Presidencia e de Sanidade e anunciaron que, mentres non obteñan unha explicación que xustifique a necesidade deste traslado continuarán coas mobilizacións.
CIG-Saúde denuncia que se mantén o recorte de horarios no servizo de helicópteros de emerxencias
Considera que a Xunta debe garantir a máxima dispoñibilidade de todos os medios posíbeis para atender as urxencias
A CIG-Saúde subliña que os custos de garantir a operatividade dos helicópteros do 061 todas as horas de día serían ridículos, o soldo dun piloto e dun copiloto. Mentres que é inxente o gasto que supuxo a construción do edificio da Estrada e o que ocasionará o traslado dos operativos e do propio persoal do 061 e do 112 a esa nova sede.
Lembra que o servizo ten máis de 25 anos e denuncia que foi cando se traspasou ao 061 cando se reduciu o horario operativo, xa que até ese momento estaba dispoñíbel de orto a ocaso, isto é, todas as horas de luz.
A CIG-Saúde salienta ademais que as comunidades autónomas que usan o sistema das 12 horas, que logo implantou en Galiza o 061, teñen cando menos 3 helicópteros, así que os que quedan operativos cobren o que pecha. Neste sentido, aseguran que se aquí se puxera o terceiro do que tantas veces se falou, na zona de Lugo (pensouse en Vilalba), podería ser factíbel ese horario deslizante, “pero con un en Santiago e outro en Ourense que ninguén diga que a costa da Morte está cuberta despois de que pecha Santiago”.
A CIG-Saúde chama tamén a atención sobre o feito de que estes horarios afectan principalmente ao período estival, cando hai máis afluencia ás praias e cando o tráfico desde a costa cara o interior é máis intenso. “Cremos que non contar con ese medio é unha vergonza”, din.
Comeza a operar o novo servizo de helicópteros do 061 recortado en medios e horas pero máis caro
Persoal do 112 e 061 denuncia que o traslado destes servizos de Compostela á Estrada é unha decisión política e non técnica
Os traballadores/as informaron este xoves das consecuencias que terá para a cidade e para os propios servizos
As urxencias médicas e as emerxencias que teñen lugar en Galiza son atendidas por dous servizos públicos dependentes da Xunta: o 061 para as urxencias sanitarias e o 112, para o resto de emerxencias. Ambos os dous presentan os seus servizos, desde hai dúas décadas, desde a capital de Galiza mantendo uns estándares de calidade indiscutidos.
No ano 2015 a Xunta de Galiza decidiu a deslocalización de ambos os servizos para un novo edificio na Estrada, contrariamente á opinión de diferentes expertos en coordinación de emerxencias e sen informar nin consultar ao persoal afectado: máis de 300 traballadores/as e as súas familias; 100 traballadores/as, no caso do 112, e 200 (100 operadores/as e 100 médicos/as) no caso do 061.
Ademais dos custos individuais derivados desta deslocalización e do aumento de tempo de traballo e cansazo do persoal afectado, esta decisión política terá consecuencias prácticas para a economía de Santiago e comarca. “Perderanse postos de traballo e tamén poboación, dado que moitos dos traballadores e traballadoras optarán por un cambiar de residencia, xerando un impacto negativo a todos os niveis”, aseguran as traballadoras e traballadores.
Entenden que se afonda na dinámica de descentralizacións que valeira a cidade de organismos públicos e cuestiona a súa referencialidade e centralidade como capital. Aseguran ademais que as expectativas xeradas na Estrada “non deixan de ser falsas”. Neste sentido explican que “non se crean novos postos de traballo xa que a maioría do persoal terminará trasladándose co seu posto, e ademais priorízanse unha infraestruturas innecesarias”.
A isto engaden que a deslocalización non só produce prexuízos, senón que ademais é inseparable dunha serie de gastos que cualifican como “escandalosos”. A este respecto, Isabel Moares, presidenta do Comité do 112, denuncia que o novo edificio, na Estrada, custou arredor de 12 millóns de euros do erario público. Un gasto que se acomete pouco despois de investir miles de euros na mellora das instalacións actuais.
Parello a isto advirten do gasto que haberá que facer para afrontar o traslado e aseguran que eses cartos deberían destinarse a salvar vidas. Sobre isto, Araceli Nine, presidenta do comité de operadores/as do 061, matiza que “este despilfarro económico hai que paralo, porque os edificios non salvan vidas, quen salvan vidas son as persoas e ter medios para facelo”.
Por iso entenden que estes cartos deberían ser destinados a solventar as deficiencias de parques de ambulancias, de bombeiros e bases de protección civil infradotadas que “resultan insuficientes e están mal repartidas”.
Alertan tamén das consecuencias que terá para o propio persoal e, en consecuencia, para os propios servizos porque quen decida non mudarse para a Estrada se verá afectado/a por un incremento do cansazo asociado aos desprazamentos, a maior dificultade para conciliar coa vida familiar e a posibilidade de que algúns dos traballadores/as con máis experiencia decidan deixar o seu posto, o que provocará, de xeito directo, unha perda da calidade do servizo.
A FGAMT-CIG de Compostela denuncia abusivas condicións laborais no sector de ambulancias da área sanitaria de Compostela
Os traballadores/as chegan a facer 240 horas ao mes, cando o legal son 170 horas, nun servizo público tan delicado como o de atención a emerxencias
Inácio Pavón, representante do sector de transportes da FGAMT-CIG de Compostela, explicou que no transporte de urxencias sanitarias do 061 trabállanse 24 horas ao día, os 365 días do ano por quendas. O servizo está xestionado, por concesión administrativa, polas empresas Ambupadrón, Ambuibérica e Ambulancias Casablanca e atinxe ás bases do 061 da Área de Santiago (agás a propia cidade) que están en Negreira, Santa Comba, Mazaricos, Muros, Noia, Ribeira, Boiro, Padrón, Arzúa, Melide, Teixeiro ou Ordes.
En cada base hai unha media de 6 traballadores/as -que deben de acreditar unha formación específica- e van dúas persoas por ambulancia. Segundo Pavón estes traballadores/as, uns 80, fan máis de 240 horas, sen contar as horas a maiores cando un servizo está iniciado, por traballador ao mes.
O representante da FGAMT-CIG denuncia que nestas empresas “non se contan as horas de presenza, nin as extras, nin as dietas que corresponden, traballo en festivos ou noites e as nóminas están calculadas aleatoriamente en base a salarios impostos e moi por debaixo do Convenio Colectivo”.
Tal é así que, polos cálculos en base aos calendarios laborais reais, cada traballador/a destas bases debería ter cobrado no mes de decembro máis de 3.000 euros, cando os salarios que realmente percibiron oscilaron entre os 1.400-1.600 euro.
Por iso, desde o mes de xullo, os traballadores e traballadoras levan intentando mellorar as súas condicións laborais pero, segundo denuncian, non teñen con quen negociar. A este respecto Pavón sinala que “as empresas que tiñan a contrata naquel momento se negaron a negociar porque non ían continuar co servizo e que as empresas actuais, en 2 meses, non foron quen de poñer unha soa proposta seria enriba da mesa”.
O cambio das concesionarias foi a finais de 2015 e o pasado 1 de decembro produciuse finalmente a subrogación dos traballadores/as, nun proceso de cambio de contrata que o representante da FGAMT-CIG definiu como “esperpéntico, con múltiples retrasos, onde todo eran rumores e navalladas entre as empresas e onde o que menos importou foron os traballadores e traballadoras ou o a calidade do servizo”.
Con todo, denuncia que o peor comportamento co seu persoal é o de Ambupadrón, con bases en Padrón, Noia, Mazaricos, Ribeira e Boiro que, asegura, “se dedica a ameazar aos traballadores e a insultar aos delegados de persoal da CIG, e a ameazar de descolgarse salarialmente do convenio colectivo”. Pavón pregúntase “como se vai poder descolgar do convenio unha empresa que cobra o que pediu e que lle foi concedida unha contrata pública con unha oferta manifestamente mais baixa que os custes reais”.
Responsabilidade do 061, o SERGAS e a consellaría de Sanidade
Para Pavón hai unha responsabilidade manifesta da administración nesta situación, porque este é un servizo xestionado pola Consellaría de Sanidade que, porén, “non fai o máis mínimo control sobre a súa calidade”.
Considera que, lonxe disto, “máis ben parece que exista un interese mútuo de empresas e administración en que sexa o máis opaco posíbel”´. Só así se explica que se permita que nun servizo público “se presenten ofertas que non cobren, nin de lonxe, o que supoñen os custes salariais de cada base”.
Sinala que xa se teñen presentado denuncias na Inspección de Traballo contra algunha destas empresas e adianta que na semana vindeira presentaranse denuncias de cantidades no xulgado.
O persoal destas empresa exixe unhas negociacións inmediatas e rápidas e que solucionen dunha vez a situación de explotación e precariedade laboral nun sector que debera ser especialmente mimado. “Non permitimos que se nos trate así. Os traballadores son os que traballan nas ambulancias do 061 e as empresas veñen e van”.
Advirte que “de non chegarmos a unha solución inmediata imos iniciar un calendario mobilizador que se decidirá en asembleas de traballadores e traballadoras na próxima semana.
Ao seu entender son responsábeis, non só ás empresas que, denuncian, “só están preocupadas polo seu beneficio económico”, senón tamén a administración, o 061, o SERGAS e a XUNTA que permite a precariedade laboral nun servizo tan sensíbel como é o traslado de urxencias sanitarias.
A CIG demanda a Sergas e 061 que doten a comarca do Salnés cunha ambulancia medicalizada
Solicita que, de contado, os concellos contesten ás peticións de reunión cos traballadores/as e coa central sindical
A FGAMT-CIG demanda, xunto co colectivo de técnicos en emerxencias sanitarias do Salnés, que se dote urxentemente á comarca cunha ambulancia medicalizada. Denuncian que o pasado sábado un xogador de fútbol, menor de idade, sufriu un desgraciado accidente traumático e que tivo que esperar á chegada dun helicóptero medicalizado, con base en Santiago, entre 30 e 40 minutos para ser evacuado. Unha situación diante da que Xavier Aboi pide responsabilidades á consellaría e que os concellos contesten ás peticións de reunión coa CIG e co colectivo de traballadores/as o máis axiña posíbel.
A CIG, o colectivo de Técnicos en emerxencias sanitarias da comarca do Salnés e o comité de empresa de Ambulancias Pontevedra, empresa concesionaria do transporte sanitario urxente(061) e non urxente de toda a area Norte da provincia de Pontevedra, explican que o pasado sábado, día 23 de xaneiro no campo de futbol de O Terrón en Vilanova de Arousa , un menor de idade, xogador do Club de Futbol Vilanova, foi evacuado en helicóptero a un centro sanitario de Santiago de Compostela logo de sufrir un accidente traumatico mentras xogaba un partido de futbol.
Sinalan que, segundo as noticias publicadas na prensa local e contadas por testemuñas presenciais, o xogador –que xa está fóra de perigo- tivo que agardar entre trinta e corenta minutos a chegada da asistencia sanitaria tendido sobre o propio terreo de xogo. Matizan, en todo caso, que non queren utilizar este tipo de acontecementos para crear ningún tipo de alarma social, eludir responsabilidades, nin cargar culpas indiscriminadas contra ninguén. Porén subliñan que “accidentes deste tipo, ou parecidos, e nos que xorden queixas na opinión publica pola tardanza da asistencia sanitaria son cada vez mais comúns nesta comarca”.
A este respecto explican que, pola información aportada polos compañeiros que estaban de garda nas dúas ambulancias asistenciais que o 061 ten na comarca do Salnes (Vilagarcía e Cambados), a hora á que ocorreu o accidente as dúas estaban ocupadas realizando outros servizos urxentes polo cal non puideron desprazarse nun primeiro momento. “Cando isto ocorre -cada vez con mais frecuencia- a central de urxencias sanitarias 061 adoita mobilizar outro recurso alleo á súa rede (Protección civil, Ambulancia privada) ou algunha propia de localidades limítrofes como Caldas de Reis”.
Advirten, en todo caso, do descoñecemento da dispoñibilidade destes recursos á hora do accidente pero, “supoñemos que non estarían operativas pois ao lugar non se desprazou ningunha delas e a decisión que se tomou foi mobilizar o helicóptero medicalizado con base en Santiago de Compostela e ao mesmo tempo enviar o medico dun centro de saúde próximo nun taxi”, din.
Entenden que, ante a tardanza da asistencia sanitaria, o nerviosismo e indignación se apoderara dos presentes no campo de fútbol ata que ao final o neno foi atendido e trasladado ao centro sanitario. Un malestar que “quedou reflectido ante os compañeiros que foron enviados ao lugar cando remataron o servizo que estaban a facer e que, como é habitual, son o branco das queixas da xente cando estas cousas suceden. Algo o que, por desgraza, estamos a sufrir cada vez con mais frecuencia”.
Lamentan non ser quen de conseguir unha mais rápida asistencia e denuncian que “por moito empeño que poñamos, os medios materiais e humanos cos que contamos son os mesmos que hai 18 anos, cando este servizo de urxencias sanitarias comezou a funcionar”. Medios que se limitan a dúas ambulancias asistenciais con base en Vilagarcía e Cambados e que cobren toda a comarca do Salnés, cunha poboación de aproximadamente 80.000 habitantes.
Máis de dez anos reclamando outra ambulancia medicalizada
A CIG lembra que leva máis de dez anos reclamando, xunto co colectivo profesional, polo menos outra ambulancia máis para esta comarca e que no último ano e medio, de forma mais intensa, desenvolveron unha campaña en demanda dunha ambulancia medicalizada. “Pensamos que é necesaria e os datos da OMS así o avalan, non só por ratio de habitantes senón tamén por outras características socioeconómicas que esta comarca posúe”.
O representante da FGAM-CIG, Xavier Aboi, sinala que nos últimos meses se recolleron miles de sinaturas a través dunha plataforma creada con este fin; celebráronse entrevistas con diversos colectivos da comarca e forzas políticas; presentouse unha pregunta a este respecto na Comisión de Sanidade do Parlamento de Galiza a través do BNG; convocáronse mobilizacións e levouse a debate en todos os concellos da comarca e na mancomunidade. Reivindicacións que 2 apoiadas en todas as institucións e organismos agás no concello de Vilanova de Arousa no que non se aprobou a moción porque, segundo o seu alcalde, xa existe unha UVI móbil no Hospital do Salnes. Un vehículo que “só se utiliza para traslados interhospitalarios e o persoal que traballa con el non fai gardas presenciais senón que está localizable e nunca dispoñible nun tempo inferior a 40 minutos ou máis”.
A CIG, e o colectivo de técnicos/as de emerxencias sanitarias do Salnés lamenta este triste accidente e que este ocorrera precisamente en Vilanova de Arousa. Denuncia, en todo caso, a insensibilidade deste concello ante estes datos que reflicten a necesidade real de máis medios de emerxencia sanitaria na comarca e agardan que se explique, por parte das autoridades, o aquí acontecido.
Reiteran á consellaría e o 061 a demanda dunha ambulancia medicalizada para a comarca do Salnés e que os concellos dean resposta á petición de reunión coa CIG e coas/coas traballadores/as.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!