Buscar novas
Persoal do 112 e do 061 entrega na Valedora do Pobo 11.238 sinaturas contra o traslado dos servizos de emerxencias á Estrada
Esta tarde tiveron unha xuntanza –solicitada desde o mes de marzo- cos concelleiros de Presidencia e Sanidade para ter, por fin, información sobre esta cuestión
Antes de facer a entrega das sinaturas, denunciaron que o traslado –que cualificaron de “forzoso”- das centrais de coordinación tanto do 061 como do 112 foi decidido de forma “arbitraria” pola Xunta de Galiza. “Levamos máis de 20 anos desenvolvendo o traballo en Santiago de Compostela cuns criterios de excelencia avalados polo recoñecemento de diversas institucións públicas e privadas e entendemos que non hai razóns para movelos”, sinalou Mario Otero, Presidente da Xunta de Persoal do 061.
Otero lembrou que as instalacións nas que se prestan estes servizos xa son públicas e que foron reformadas entre 2010 e 2012. Xunto a isto sinalaron que “teñen capacidade de crecemento para aumentar a posible demanda da atención das emerxencias; están situadas na mellor ubicación: nunha cidade coas mellores comunicacións de toda Galiza, con tren, autoestrada e aeroporto. Por iso non entendemos as razóns, que só podemos ver como políticas do traslado da central ao concello da Estrada”.
Denunciou que, a esta altura, nin sequera teñen datas confirmadas de forma oficial de cando sería o traslado aínda que se barallaron ao longo deste ano varias: desde que sería efectivo no primeiro trimestre deste ano, até que sería neste mesmo mes e advertiu de que facer o traslado durante o verán “non sería o mellor momento”.
Subliñou ademais que o traslado é un problema tanto para a cidadanía, “porque se incorre nuns gastos” que cre que non habería que facer, como para o propio persoal que desenvolve a súa actividade nestes servizos de emerxencia. Neste sentido alertou da posibilidade de que se produza un empeoramento da atención das emerxencias, pola posíbel perda de capital humano. “Hai traballadoras e traballadores que poderían non ser capaces de soportar os custos do traslado, tanto económicos como persoais”.
A este respecto explicou que afecta a máis de 250 familias arraigadas en Compostela e comarca que teñen que trasladarse a un novo centro de traballo, na Estrada, sen ningún tipo de información, nin negociación. Un cambio que vai imposibilitar totalmente a conciliación da vida persoal e familiar. “Teremos que estar na estrada, cun claro incremento do risco de accidentes in itinere e un aumento do nivel de estrés, nun traballo que xa de por si é estresante”, afirmou.
Da xuntanza da tarde cos conselleiros de Presidencia (do que depende o 112) e de Sanidade (do que depende o 061) o persoal dos servizos de atención de emerxencias agardaba obter explicacións e respostas. “Teremos por fin a posibilidade de coñecer de primeira man os plans do goberno porque directamente non tivemos noticia, nin sequera unha orde de traslado. Só sabemos o que se debateu no Parlamento e o que se publicou debateu nos medios de comunicación”, concluíu Otero.
Ambuibérica segue incumprindo o convenio e contrata traballadores/as en prácticas cun 60% do salario
Os traballadores e traballadoras concentráronse esta mañá diante do Hospital Clínico de Santiago para exixir condicións laborais dignas e a intervención do Sergas e do 061
No decurso da concentración o representante da FGAMT-CIG, Inácio Pavón, asegurou, en declaración aos medios, que con estes incumprimentos Ambuibérica “busca aumentar o seu beneficio a costa dos traballadores e traballadoras e da calidade do servizo nas ambulancias”.
Pavón explicou que na área sanitaria de Santiago esta empresa ten a concesión das bases de Melide, Teixeiro, Lalín, Silleda, Negreira, Santa Comba e Muros e tamén está nos lotes da Costa da Morte, Vigo e Baixo Miño ademais de ter participacións en moitas outras pequenas empresas coas que se asociou.
Lembrou que no resto de bases da área sanitaria existe un acordo coas empresas (Ambulancias Casablanca e Ambupadrón), que garante o cumprimento do convenio e ao que Ambuibérica se nega “aducindo que senón perdería diñeiro”.
O representante da FGAMT preguntouse como pode ser que a unhas empresas si lles dea e a Ambuibérica non, se cobran exactamente o mesmo. “Algunha das explicacións veñen das características desta empresa que só se guía polo lucro, algo perigoso nun sector público como é o das ambulancias”.
Sinalou que Ambuibérica ten a súa sede en Valladolid, con dirixentes ligados ao Partido Popular, e que desembarcou no sector galego favorecida polo último concurso público das ambulancias de emerxencias. Alertou de que, previsibelmente vai levar boa parte do “pastel” no servizo programado (diálise, altas médicas, translados,...) que se resolve nos próximos días, cunhas bases sospeitosamente favorábeis á súa oferta.
Asegurou que esta empresa é coñecida no sector polas súas prácticas antisindicais e que foi condenada en numerosas ocasións por vulnerar o dereito dos traballadores noutras comunidades. Explicou que en Aragón mesmo foi sancionada por estafa ao facturar sistematicamente viaxes falsos, mesmo a persoas falecidas. “Esta é a súa ética empresarial que antepón os seus intereses e beneficios económicos frente a calidade dun servizo público que debería ser atendido de outro xeito polas administración”.
Traballadores/as en prácticas cun 60% do salario
Inácio Pavón denunciou que aquí pretende o incumprimento do convenio colectivo e que non atende as demandas sindicais de cumprimento dos horario, salarios, condicións das bases, desinfección de uniformes, etc. A isto engadiu que “desde que se ten denunciado esta situación a empresa contratou só traballadores en prácticas que cobran un 60% do salario e non superando os 900 euros no mellor dos casos por unha xornada completa”.
Os traballadores denuncian a situación de precariedade e as ameazas que sofren e advirten da peor calidade do servizo que se presta nestas condicións. Ademais denuncian que o 061, o SERGAS e a Xunta “miran vergoñentamente para outro lado” e demandan que asuman a súa responsabilidade nun servizo público como este.
Demandan que se faga, desde a administración un seguimento da calidade do servizo que presta ás/aos doentes e das condicións dos empregados e empregadas. “A responsabilidade desta situación é do PP e da Xunta, responsábel do servizo que prestan estas empresas, e así o denunciaremos até que se solucione esta situación”.
Delegados/as da CIG nas ambulancias protestan diante de Ambuiberica en Vigo polos incumprimentos da empresa
Denuncian que a firma, que xestiona as Urxencias do 061 en varias zonas do país, non aplica o convenio no referente á saúde laboral
A mobilización, na que participaron representantes sindicais da FGAMT-CIG nas ambulancias da Coruña, Vigo, Pontevedra e Santiago , desenvolveuse diante das instalacións da empresa na rúa Colombia de Vigo de 11.30 a 12.30 horas. Alí despregaron unha faixa contra a precariedade no sector e berraron consignas para reclamar unha solución ao conflito laboral.
Dende a FGAMT-CIG explican que os empregados/as do sector denuncian os problemas que padecen a causa dos incumprimentos da empresa na aplicación do convenio colectivo, sobre todo en materia de saude laboral, polas deficiencias en canto á desinfección e limpeza dos unifermos de traballo e das bases.
Trátase dun problemática que se reproduce nas distintas zonas onde Ambuiberica ten a concesión das Urxencias do 061 nas provincias da Coruña e Pontevedra, entre elas Vigo e o Baixo Miño. De feito, o cadro de persoal da área sanitaria de Santiago xa desenvolveu protestas polos mesmos motivos con anterioridade.
A intención dos traballadores/as é continuar coas mobilizacións nas vindeiras semanas, sen descartar incluso a convocatoria dunha folga no servizo, xa que a súa preocupación vai en aumento despois de coñecer que a empresa -á que a CIG ten sinalado pola súa vinculación ao PP- opta tamén a facerse coa xestión dos servizos non urxentes do 061.
A FGAMT de Compostela anuncia que se chegou a acordo con Ambupadrón S.L e denuncia que Ambuibérica segue incumprindo o convenio
Convocan unha concentración diante da entrada principal do Hospital Clínico de Santiago, este martes, día 26 de abril, ás 10:30 horas
Para Inácio Pavón, da FGAMT de Compostela, isto demostra, máis unha vez que “a presión e a mobilización son as que realmente conseguen avances significativos nun sector no que na maioría das bases o cumprimento do convenio colectivo era unha utopía, algo do que as empresas e a administración sacaron moito proveito nos últimos anos”.
O representante da FGAMT asegura que o que demostran estes acordos é que o que para unhas empresas é rendíbel “tamén o ten que ser para as outras”.
Por iso denuncia que a empresa mais grande, Ambuibérica SL, segue pretendendo incumprir o convenio colectivo aducindo posíbeis perdas. “Queda claro, tras da sinatura destes dous acordos que iso é falso, xa que todas as empresas cobran o mesmo por cada base e se a empresas pequenas como Ambulancias Casablanca ou Ambupadrón lles dá para cubrir custes e ter beneficios a Ambuibérica tamén”, explica Pavón, quen matiza que, isto foi un concurso público onde as empresas gañadoras decidiron ir por debaixo dos custes reais e “agora pretenden que sexan os traballadores e as traballadoras quen llo financie”.
Ambuibérica é unha empresa con sede en Valladolid que irrompeu neste sector en Galiza e pretendía aproveitarse dunhas condicións de traballo que existían neste sector, moi por debaixo do fixado no convenio. Así entrou con moita forza neste pasado concurso collendo amplas zonas na área sanitaria de Santiago (Melide, Teixeiro, Lalín, Silleda, Negreira, Santa Comba e Muros) e tamén nos lotes da Costa da Morte, Vigo e Baixo Miño ademais de ter participacións en moitas outras pequenas empresas coas que se asociou.
O representante da FGAMT explica que nas reunións que está mantendo coas diferentes bases a empresa está presionando ao persoal para que acepte condicións de traballo que non cumpran o convenio e senón “ameaza con mudar a un trato agresivo chegando a manifestar que se se lles exixía cumprir o convenio -ademais de modificar horarios para perxudicar ao persoal- non se cambiarían as rodas das ambulancias até que estiveran sen debuxo ou agardar a que se gastaran de todo as pastillas de freno, obviando o que representa iso como ameaza e a seguridade do persoal e un grave risco para pacientes e persoal sanitario”.
A FGAMT-CIG de Compostela advirte que “estas actitudes por parte de Ambuibérica non se van permitir” e ademais de ter denunciado esta situación na Inspección de Traballo, todo o sector unido “vai responder contra esta empresa mediante mobilización nas bases, sedes da empresa e hospitais de referencia”.
Responsabilidade do 061, do Sergas e da Xunta
Para Pavón non é de recibo que as traballadoras e traballadores se teñan que enfrontar a un conflito para que se cumpran unhas condicións que xa viñan garantidas polo convenio colectivo do sector. Por iso denuncia que “a fundación 061 e o Sergas son perfectamente coñecedores do estado deplorable das bases e de algunhas ambulancias, de que non hai o persoal necesario en cada base que redunda nun exceso de horas de traballo.
Concurso para a concesión do servizo programado
Ademais das ambulancias de emerxencias do 061 en datas recentes saíu a renovación do servizo de programado que abrangue aqueles servizos como determinados tratamentos, diálise, altas hospitalarias, ... Desde a FGAMT de Compostela tamén advirten ás empresas que “non pretendan dicir despois que non sabían ao que se atiñan se deciden ir por debaixo nas ofertas para facerse con este servizo, agora en fase de adxudicación”.
A isto engaden que “tanto ten se até o de agora, igual que pasou coas ambulancias do 061, non se cumprían as condicións, porque coa nova contrata os traballadores e traballadoras, agora organizados, van exixir que se cumpra”. Algo que Pavón entende que deben ter en conta as empresas á hora de facer as ofertas. “Rematouse que sexa a costa dos traballadores e traballadoras que se obtivera o lucro por parte das empresas sexan pequenas empresas galegas, sexan grandes empresas que veñen de fora a facer negocio como Ambuibérica”, conclúe.
Traballadores/as das ambulancias do 061 de Compostela maniféstanse en Padrón en demanda do cumprimento do convenio colectivo
Acádase un acordo con Ambulancias Casablanca
Os traballadorese traballadoras concentráronse primeiro diante das instalacións de Ambupadrón, SL que leva semanas presionando e ameazando con represalias os seus traballadores e traballadoras. Posteriormente manifestáronse polas rúas de Padrón até o Centro de Saúde informando á veciñanza da súa situación e denunciando o acoso laboral aos que lles somete a súa empresa.
Responsabilidade do SERGAS, da Xunta e do 061
Responsabilizan o 061, o SERGAS e á Xunta de Galiza por permitir os abusos e por non facerse cargo da solución desta situación. Neste sentido denuncian a actitude, que Inácio Pavón, representente da FGAMT-CIG de Compostela culificou de “persoanalista” e “impresentable” de Antonio Iglesias -Director da Fundación 061- por negarse a manter unha reunión cos traballadores afectados por aprecer unha pintada que lle solicitaba unha solución ao conflicto.
“Unha vez convocada a reunión, que debería terse celebrado esta mesma mañá, avisaron desde o 061 de que se desconvocaba se os traballadores non borraban esa pintada, culpabilizando e desatendendo así a todo o colectivo”, expliocu Pavón, quen denunciou a actitude “pasiva” da administración mentres se están producindo presións, cambios de quendas e ameazas de despedimento a traballadores do sector.
O conflicto orixínase porque as empresas da área sanitaria se negan a cumprir o convenio colectivo tras ter feito unha oferta á baixa para quedar co concurso público hai catro meses.
Nos vindeiros días sucederanse as asembleas nas diferentes bases do 061 e anunciaranse novas mobilizacións que non rematarán mentres non finalicen as presións e non se asinen acordos que garantan o cumprimento do convenio colectivo.
Acordo en Ambulancias Casablanca.
Froito da unidade dos traballadores e traballadoras, na tarde do mércores asinouse o acordo que garantirá o cumprimento do convenio coelctivo en materia de xornada e salario en Ambulancias Casablanca, SL nas bases de Arzúa e Ordes. Este acordo únese ao que esta empresa xa asinara no mes de outubro para a base de Santiago e que inclúe as mesmas condicións.
Desta maneira son Ambuibérica, SL e Ambupadrón, SL as únicas empresas da área sanitaria que manteñen unha actitude insostíbel de incumprimento do convenio colectivo. Pavón explica que o seu principal argumento, que era que nas bases do rural non se podían manter os mesmos horarios e salarios porque entrarían en perdas “queda ao descuberto como falso logo da sinatura deste acordo. Se a Ambulancias Casablanca, que cobra exactamente o mesmo por cada base, lle dá para pagar os salarios co número de traballadores necesario para cumprir os horarios do convenio, ao resto de empresas tamén”.
Considera, ante isto, que “a pelota agora está no tellado de Ambuibérica, SL e Ambupadrón, SL” que deben “arranxar imediatamente esta situación en vez de dedicarse a presionar aos planteis para que acepten rebaixas que non se van a producir”. Entende, xa que logo, que o acordo alcanzado en Casablanca é o único posíbel para resolver esta situación.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!