Buscar novas
Técnicos/as sanitarios/as da FGAMT-CIG inciden en reclamar unha ambulancia medicalizada para o Salnés
Mantiveron unha xuntanza co BNG para analizar o déficir de atención sanitaria na comarca
Na reunión participou unha representación de técnicos/as sanitarios/as da FGAMT-CIG e outra do BNG. Ambas as organizacións coincidiron na necesidade de que a comarca do Salnés conte cunha ambulancia de soporte vital avanzado de forma prioritaria, pois a demanda desa unidade medicalizada “é unha necesidade máis que xustificada”, tanto polos datos dos propios/as técnicos/as do servizo de emerxencias, como por un recente informe da Sociedad Española de Medicina de Emergencias Sanitarias (SEMES).
Segundo explican dende a central, este informe da SEMES o que fai é dar máis arguemntos aínda á reivindicación dos técnicos/as sanitarios/as e da CIG. Nas súas conclusións, sinala que a UVI móbil para O Salnés “debera estar dispoñíbel 24 horas 365 días ao ano e dotada de persoal experto na asistencia de emerxencias, dependente do 061 de Galicia, con capacidade de resposta en menos de tres minutos ante calquera emerxencia que ocorra en calquera punto da comarca e que chegue con garantía de éxito nun tempo máximo de 20 minutos”.
Os representantes da CIG aportaron datos da Organización Mundial da Saúde (OMS) e a súa propia experiencia no día a día. O técnico de emerxencias sanitarias José Manuel Ribadomar lembrou que “levamos reivindicando a UVI móbil dende 2014, unha reivindicación que iniciou a CIG e posteriormente foi asumida polos veciños/as da comarca. Ao mesmo tempo, indicou que os profesionais trasladan as dificultades que día a día atopan no seu traballo, os problemas e as deficiencias na asistencia extrahospitalaria de emerxencias.
Pola súa banda, a representación do BNG comprometeuse a levar a problemática ao Parlamento galego e a solucionar as carencias de forma “prioritaria” no caso de conseguir os apoios suficientes para entrar no futuro Goberno da Xunta. Posteriormente á reunión celebrouse unha concentración na Praza de Galiza para reclamar publicamente a dotación dunha ambulancia medicalizada para o Salnés.
Redúcese o persoal sanitario e o horario de atención no aeroporto de Santiago
A CIG-AENA reclama a cobertura total do servizo sanitario en Lavacolla
Juan Manuel González Méndez, enfermeiro do aeroporto e representante da CIG no comité, lembra que o 1 de agosto deste ano a dirección do aeroporto impuxo ao colectivo sanitario unha modificación substancial do horario laboral e remitiu aos traballadores un escrito segundo o que “para evitar situacións de incertidume, sobre se hai servizo de sanidade ou non, ante unha incidencia e/ou accidente que requira a intervención dun TMA: ATS, considera necesario que, para garantir un servizo axeitado, rápido e continuado dentro dunha franxa horaria, durante os 365 días do ano, é necesario modificar o horario habitual deste colectivo”.
Porén, transcorrido menos dun mes este obxectivo non se está cumprindo porque “a dirección do aeroporto non está contratando persoal para cubrir baixas, permisos e demais, malia estar así contemplado no convenio colectivo”, afirma o representante da CIG.
González Méndez explica que “con cinco traballadores facemos unha cobertura continuada de 18 horas. O problema é que neste momento hai unha persoa de vacacións e dúas de baixa polo que somos incapaces de cubrir todas as quendas quedando así moitos servizos descubertos”. A isto engade que “isto contradí claramente as razóns esgrimidas pola dirección para impor o cambio de xornada”.
Para a CIG-AENA esta situación é moi preocupante porque precisamente agora, no mes de agosto, é cando máis fluxo de pasaxeiros hai. Fluxo que ademais se incrementou nun 10,6% no último ano. “Hai franxas horarias, como de 7:30 a 10:00h, 14:00 a 16:30 ou de 20:00 a 22:30 horas, nas que podemos estar falando de máis de 3.000 persoas circulando a un tempo por Lavacolla entre chegadas e saídas”, matiza.
O representante da CIG no comité explica que “se estamos nós calquera incidencia sanitaria que ocorra no aeroporto atendémola de xeito inmediato e segundo sexa a gravidade solucionámola in situ ou avisamos ao 061. O problema é que se a incidencia ocorre nos horarios non cubertos, non queda outra que chamar a emerxencias”.
Lembra que o tempo medio de resposta e chegada do 061 ao aeroporto é duns 20 minutos, que “de ser unha incidencia leve estaríanse malgastando medios públicos e que, porén, de ser unha incidencia grave, como un infarto, habería que agardar eses 20 minutos para atendelo, co grave risco que isto supón para a vida da persoa afectada, mentres que tería atención inmediata se estamos nós”.
Diante desta situación a CIG-AENA demanda que desde a dirección do aeroporto se garanta a cobertura completa do servizo e o persoal necesario para que funcione coa continuidade necesaria para garantir a mellor atención sanitaria posible nas instalacións do noso aeroporto os 365 días do ano.
A CIG-Saúde reitera a necesidade de dotar a área sanitaria do Salnés cunha ambulancia medicalizada
Considera que suporía unha mellora destacábel na asistencia dunha zona que duplica a súa poboación no verán
Na central lembran que a área sanitaria do Salnés dá servizo a máis de 75.958 usuarios/as dos concellos de Vilagarcía (con máis de 37.000 habitantes), Cambados, Vilanova de Arousa, Illa de Arousa, Ribadumia e Catoira. “Superamos os 115.000 usuarios/as se contamos Sanxenxo, O Grove, Meaño e Meis, aínda que no verán esta cifra duplícase”. Así, consideran que se trata dunha poboación máis que suficiente para xustificar a necesidade da ambulancia medicalizada, “segundo todas as recomendacións”.
Ao mesmo tempo, inciden en que co novo vehículo os desprazamentos dende Vilagarcía ás distintas poboacións como Catoira, Vilanova, Cambados ou Ribadumia serían inferiores a 20 minutos, e menos de 30 minutos a Sanxenxo. “Se tomamos como referencia outras áreas asistenciais estariamos a falar duns 120 servizos mensuais, que en época de verán poderían chegar aos 200”. Ademais, a existencia do corredor do Salnés, “co seu historial de accidentes de tráfico”, e os accidentes laborais que se poidan dar no sector industrial da zona como outros dos motivos que xustificarían a decisión de dotar a área desta ambulancia.
“Non esquezamos que o hospital do Salnés non dispón de Unidade de Coidados Intensivos nin de hospitalización de cardioloxía, medulares ou neurociruxía, o que fai que cada ano máis de 500 pacientes, dos 37.000 que chegan ao servizo de urxencias, teñan que ser derivados a outros centros hospitalarios”, indican.
Finalmente, sosteñen que este vehículo é tamén necesario para o Programa Galego de Atención o Infarto Agudo de Miocardio (Progaliam), xa que ao non dispor dunha sala de hemodinámica no hospital do Salnés para realizar a anxioplastia primaria un paciente infartado nesta área -de contar cunha ambulancia medicalizada- reduciría o seu desprazamento ate o centro de referencia en Vigo como mínimo en 20 minutos, “e xa sabemos que nestes casos o tempo é vida”.
De igual xeito no caso dun ictus, xa que unha vez realizada a primeira intervención no hospital do Salnés os pacientes teñen que ser trasladados/as ao Hospital Clínico de Santiago para continuar o tratamento e os coidados posteriores.
A FGAMT-CIG convoca folga indefinida en Ambunova polo atraso no pago de salarios
O paro afectará ao servizo de transporte sanitario non urxente das comarcas de Santiago e do Barbanza a partir do 17 de agosto
Segundo explicaron en rolda de prensa o representante da FGAMT-CIG de Santiago, Nacho Pavón, e o delegado de persoal de Ambunova, Herminio Rivas, a central adoptou a decisión de convocar a folga indefinida a partir do vindeiro mércores 17 de agosto ante os reiterados incumprimentos á hora de abonar as nóminas do cadro de persoal, integrado por uns 30 traballadores/as.
A compañía concesionaria do servizo de transporte sanitario non urxente das comarcas de Santiago e do Barbanza acumula reiterados atrasos no pago dos salarios, até o punto que non ingresou os soldos dos últimos dous meses. Ao mesmo tempo, os problemas na empresa acumúlanse porque tampouco se substitúe o persoal que se atopa de baixa, o que está a provocar que se deixen servizos sen realizar. “A situación chega até o punto de que as ambulancias tampouco se amañan, polo que nestes momentos hai sete que non se poden utilizar por pequenos problemas de mantemento”, indican.
Neste senso, denuncian que hai algúns servizos que están a ser asumidos por vehículos do 061, “algo que nos parece moi grave, xa que se bota man de ambulancias de urxencias para cubrir transportes non urxentes; pode haber unha emerxencia e atoparse a ambulancia ocupada”.
Outra das deficiencias coas que teñen que convivir os empregados/as ten que ver co combustíbel, “xa que a diario nos atopamos coa incerteza de saber se poderemos repostar”. De feito, a semana pasada estiveron unhas horas sen teléfono de empresa porque a compañía de telecomunicacións optou por bloquear a liña por impago.
Esta problemática foi posta en coñecemento da dirección de Ambunova, que continúa sen ofrecer ningunha información a traballadores/as e usuarios/as. “O Sergas, que é o titular do servizo, tampouco está a facer nada por arranxar a situación, até o punto de que non contestaron a petición de xuntanza que lle trasladamos hai máis dunha semana”.
Segundo explican os representantes sindicais da CIG, esta situación é común en todo o sector das ambulancias do noso país. “Ambuibérica, outra empresa do sector que opera en Galiza, tamén leva dous meses con atrasos nas nóminas e con persoal contratado a media xornada e que traballa a xornada completa”, sinalan.
Persoal de Ambuibérica mobilízase polas rúas de Pontevedra coincidindo coa segundo día de folga
Unha representación dos traballadores/as das ambulancias e da CIG mantivo unha reunión con Sanidade para esixir a intervención do 061
A mobilización convocada coincidindo co segundo día de folga arrincou do local da CIG na cidade arredor das 11.00 horas e pasou pola Praza da Ferrería antes de dirixirse cara ao edificio administrativo da Xunta de Galiza en Campolongo, onde Xabier Aboi, da FGAMT-CIG, tomou a palabra para explicar os motivos do paro.
As reivindicacións do persoal tamén lle foron trasladadas a continuación a responsábeis da Consellería de Sanidade na provincia durante a xuntanza que mantiveron cunha representación dos empregados/as e da CIG.
En concreto, os afectados/as reclaman a interevención da Fundación 061 no conflito laboral. “Ten que sentar á empresa para analizar os flagrantes incumprimentos de convenio e exercer un control efectivo sobre as bases e os equipos”, indican. Neste senso, consideran totalmente inaceptábel que Ambuibérica non cumpra co establecido no prego de condicións.
Por exemplo, citaron que non sigue os protocolos fixados para os casos de epidemia e mantén as bases “nunha situación escandalosa”. Ademais, denuncian que estean a botar man de xente sen experiencia para conducir as ambulancias, “o que provoca accidentes dos que logo son culpabilizados os traballadores/as coa apertura de expedientes por faltas moi graves”.
Finalmente, pregúntanse cal é o motivo polo que o 061 non exerza un control sobre a empresa nin sobre o cumprimento ou non do prego de condicións fixado na adxudicación do servizo. “Ou son moi amigos/as da dirección ou son moi vagos/as”, zanxan.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!