Buscar novas
O TSXG da a razón a CIG-Saúde e anula a mobilidade interna voluntaria de persoal non sanitario de 2019
A Fundación Pública “Urxencias Sanitarias de Galicia-061” convocou en 2019 un procedemento de mobilidade voluntaria de persoal non sanitario fixo na que excluía 2 prazas do grupo administrativo da función administrativa: a da secretaría de Xerencia e a da secretaría de Dirección de Xestión e Servizos Xerais. A CIG-Saúde presentou recurso de alzada contra esta convocatoria ao considerar que non se podían excluír as prazas xa que eran de carácter básico.
Ante o silencio da administración a CIG-saúde interpuxo demanda diante do Xulgado do Contencioso administrativo nº 1 de Santiago que ditou sentenza a favor da administración, validando os argumentos desta sobre a falta de representatividade do Delegado Sindical da CIG-Saúde para presentar a reclamación, sen entrar no fondo da demanda.
A CIG-Saúde co fin de defender os seus interese e o do conxunto dos traballadores presentou recurso de apelación diante do TSXG.
O TSXG en sentenza do 17 de abril do 2024 ven de dar a razón a CIG-Saúde tanto na forma como no fondo do asunto. Así declara que o delegado sindical da CIG-saúde estaba lexitimado para presentar o recurso contra o proceso e entrando no asunto indica que a dirección do 061 non podía excluír as 2 prazas do grupo administrativo da función administrativa de carácter básico do proceso.
Sobre o argumento da dirección do 061 en relación a que as prazas excluídas poderían ser obxecto dunha convocatoria para su provisión, a través del sistema de libre designación de forma similar a como se veñen cubrindo as secretarias de Dirección en el SERGAS, o TSXG sinala que esa conversión de prazas básica a prazas de libre designación non se tiña, nin ten feito a dia de hoxe.
Finalmente, a sentenza do TSXG ordena a retrotracción del procedemento de mobilidade interna voluntaria, para incluír todos los postos vacantes.
Sanidade non garante o pago de salarios do persoal de Ambulancias do Atlántico, que irá á folga
A empresa concesionaria do 061 en Vigo, Cangas e Moaña renuncia aos contratos coa Administración e anuncia a súa intención de entrar en concurso de acredores
Na xuntanza mantida o pasado venres entre altos cargos da Consellería, Sergas e 061 coa representación do comité de folga da CIG, CCOO e USO non se garantiu o abono dos salarios pendentes ao persoal de Ambulancias do Atlántico, concesionaria do servizo de transporte urxente en Vigo, Cangas e Moaña e do non urxente en toda a área sanitaria. En consecuencia, o persoal manterá as dúas xornadas de folga previstas para os días 2 e 3 de maio se antes deste mércores día 1 non perciben os soldos que se lles adebedan.
Os responsábeis autonómicos insistiron en que “non queren oír falar” de asumir a xestión directa do servizo público de transporte sanitario e manifestaron que o pago directo das nóminas por parte da Consellería non é unha opción viábel. En todo caso, calquera solución pasa por contar con outra empresa concesionaria que asuma o servizo.
Recoñeceron que a solución proposta pola Consellería a semana pasada de adiantar o diñeiro da facturación mensual ao empresario Carlos Simón para que puidese pagar as nóminas non era xa unha opción polo perigo de que o diñeiro volvese desaparecer das contas da empresa. Algo que xa advertiran os representantes sindicais.
Polo tanto, a única saída para o Sergas é a de intervir temporalmente a empresa Ambulancias do Atlántico mentres se pon en marcha un procedemento urxente de licitación para designar unha nova concesionaria que se faga cargo do servizo.
O procedemento de intervención pública consiste no nomeamento dunha persoa como interventora que será designada polo ente público para que actúe xestionando a empresa. Este proceso xa está acordado para o servizo urxente dende o pasado luns e a previsión da Xunta é que o nomeamento se faga efectivo hoxe mesmo. Sen embargo, para o servizo programado haberá que agardar até o 6 de maio.
Perda de tempo do Sergas
Representantes do comité de folga da empresa Ambulancias do Atlántico acusaron ao Sergas de perder un tempo crucial intentando negociar co empresario Carlos Simón e a súa contorna en lugar de iniciar de inmediato a intervención pública da empresa.
Pese á renuncia oficial efectuada por Ambulancias do Atlántico a todos os contratos públicos coa Administración e aos esforzos da Consellería de Sanidade de nomear a figura dun interventor público na empresa que poida dirixir os cartos do Sergas ao abono das nóminas do persoal traballador, non existen garantías de que isto poida ser así debido a situación de insolvencia da empresa.
Representantes de CIG, CCOO e USO teñen a sospeita fundada de que en canto o diñeiro público volva entrar nas contas da empresa será automaticamente dirixido ao pago dalgún embargo dada a situación actual de quebra económica. Compre lembrar que na actualidade Ambulancias do Atlántico adebédalle dous meses á Seguridade Social e ten impagos de centos de miles de euros con entidades bancarias, empresas de renting de ambulancias, subministradoras de combustible ou compañías aseguradoras, entre outras moitas.
Nova desaparición do propietario
Durante esta semana, tanto responsables da Consellería como representantes da empresa indicaron á representación de CIG, CCOO e USO que o empresario Carlos Simón volveu “marchar” abandonando as súas responsabilidades na xerencia da empresa, deixando un poder especial para a Administración a unha traballadora e nomeando ao seu irmán e tamén empresario Óscar Simón como único interlocutor válido da empresa. O seu irmán explicou que Carlos Simón volve a estar novamente fora de Galiza e que se atopa, unha vez máis, incapacitado para calquera toma de decisións.
Óscar Simón comunicou á Consellería de Sanidade que conta co seu compromiso persoal para facilitar o proceso de transición no cambio de empresa licitadora e para garantir o abono no pago de salarios, pero matizou que en ningún caso se poderá contar co seu compromiso patrimonial para estes fins.
A nova fuxida do empresario e o cambio de interlocutor na empresa, non lle dá ningún tipo de confianza nin de garantías á representación do persoal. De feito, non fai máis que empeorar as cousas posto que o tamén empresario de ambulancias, Óscar Simón, está a ser investigado dende marzo de 2023 polos Mossos d'Esquadra e a Garda Civil e interrogado pola Audiencia Nacional no marco dunha operación anticorrupción nas ambulancias catalanas por unha suposta alteración da licitación pública en Catalunya, cando era socio do seu irmán na mesma empresa.
Folga e ultimato á Xunta
O persoal traballador de Ambulancias do Atlántico acordou o venres en asemblea que a folga convocada para os días 2 e 3 de maio non se paralizará a non ser que a totalidade das nóminas de abril estean abonadas antes do día 1 de maio, tal e como esta acordado coa empresa concesionaria.
Advirten que a situación é totalmente insostible e que de non cumprir estes prazos enfrontaranse a unha folga “dura” con mobilizacións nas que contarán co persoal doutras áreas sanitarias que xa anunciaron a súa presencia en Vigo para colaborar de forma solidaria nas protestas.
Así mesmo, a concentración prevista para o vindeiro xoves 2 de maio diante da sede do Sergas en García Barbón non se cancelará aínda que o persoal cobre as súas nóminas, posto que os incumprimentos graves en material laboral así como outras débedas económicas continúan sen resolverse.
En previsión de que o conflito se estenda no tempo, as centrais sindicais de CIG, CCOO e USO comezaron dende onte a recadar cartos entre o persoal para a creación dunha caixa de resistencia que poida paliar o impacto económico das persoas traballadoras que secunden a folga.
O persoal de Ambulancias Casablanca acorda iniciar mobilizacións ante o deterioro das condicións de traballo
Denuncian os incumprimentos da empresa, despedimentos e presións
Os traballadores de Ambulancias Casablanca, SL decidiron en asemblea iniciar mobilizacións ante os sucesivos incumprimentos e deterioro das condicións de traballo nesta empresa. As datas concretaranse nos vindeiros días, pero xa advirten que “rematarán na convocatoria dunha folga e mobilizacións en toda a UTE se non se soluciona este conflito”.
Ambulancias Casablanca forma parte dunha UTE con Ambulancias do Cantábrico (de HTC Group) e realiza o transporte sanitario non urxente da área sanitario de Santiago, dependente do SERGAS.
Segundo explica o representante da FGAMT-CIG de Compostela, Inácio Pavón, durante anos foi a acción sindical quen foi conseguindo que unha das empresas nas que peores condicións de traballo había, fora aceptando que tiña que cumprir como as demais. “Isto custou moitas horas de negociacións, pero tamén denuncias e acción sindical para que, arrastrando os pés, foran cumprindo. E unha vez máis volven deixar de lado os acordos, o que levou a esta situación e que cadro de persoal tivera dito que xa abonda”.
Por iso, esta mañá compareceron os delegados de Ambulancias Casablanca, os delegados de Ambulancias do Cantábrico e o responsable da FGAMT-CIG de Santiago para facer públicas as reivindicacións e anunciar o inicio de mobilizacións.
Sospeitas de contratación de familiares sen titulación
Pavón sinala que ás portas dun novo concurso público “atopámonos con que novamente se incumpren os acordos de contratación -polos cales se respectarían as antigüidades e se cubrirían os postos fixos con traballadores e traballadoras indefinidas- e se despide traballadores para contratar outros aos que se lles advirte que non deben de falar coa representación sindical”. Apunta que “mesmo hai sospeitas fundadas, e que serán postas nas mans da fiscalía nos próximos días, de que se contratou familiares sen titulación e que esta foi falsificada”.
O representante da FGAMT-CIG de Compostela denuncia que os traballadores despedidos fórono “por ter solicitado a limpeza dos seus uniformes”, como o resto de traballadores e como é obrigatorio por parte das empresas ao tratarse dun servizo onde existe un risco biolóxico, e “por terse afiliado ao sindicato”.
Os delegados de persoal denuncian presións por parte do encargado aos máis novos para que non rexistren as horas extras, non deixen uniformes para lavar ou se relacionen coa representación sindical. Ademais de ser habitual chamar fora das horas de traballo e cambiar permanentemente o cuadrante de traballo sen informar á representación sindical.
Sen a titulación necesaria
Tamén denuncian que os servizos UVI, que ten esta empresa na súa parte da concesión da UTE, se están a realizar servizos con traballadores sen a titulación necesaria o que é directamente ilegal e que tamén é responsabilidade do Sergas e do 061 por non levar un control sobre esta práctica fraudulenta e que pon en risco as vidas das persoas.
Outra das demandas dos traballadores é sobre o estado das ambulancias sobre as que non se realiza os mantementos nin tan sequera as limpezas adecuadas, co conseguinte risco para os traballadores e usuarios e usuarias, como un claro deterioro do servizo que se presta. “Falamos de escalóns que directamente se lles arrincan ás ambulancias porque non se reparan ou de ancoraxes de cadeiras de rodas en mal estado”, explican.
Non existe ademais no centro de traballo un espazo axeitado para a limpeza e desinfección das ambulancias tras a denuncia da veciñanza porque se estaban facendo directamente na rúa.
A CIG-Saúde denuncia o incumprimento, unha vez mais, do contrato de servizo de transporte sanitario aéreo do 061
O helicóptero con base en Santiago estará inoperativo do 15 ao 19 de abril
A CIG-Saúde vén de denunciar que o helicóptero medicalizado con base en Santiago H3 está inoperante dende onte luns 15 de abril, ás 13:00 horas, e que non se agarda que volva estar operativo até o venres día 19 deste mes. Aínda que os pregos do servizo establecen que a empresa adxudicataria debe dispor dun aparello de substitución, ELIANCE HELICOPTER GLOBAL SERVICES, S.L. non vai cumprir está cláusula dos pregos.
A CIG-Saúde sinala, ademais, que está inoperatividade non está causada por un imprevisto senón que se trata dunha intervención programa para a instalación dunha caixa de comunicación que os pregos establecen como obrigatoria.
Esta situación dáse no marco temporal de cambio de contrato do servizo de transporte sanitario urxente aéreo da FPUSG-061. O novo contrato foi formalizado o pasado 18 de marzo 2024, despois de que a primeira licitación quedará deserta e se volvera a licitar o mesmo servizo por 3 millóns mais de euros.
O aparello en cuestión chegou á base de Santiago en febreiro coa intención de quedar xa para prestar servizo co novo contrato, pero estivo inoperante debido a que non había espazo suficiente no asento do persoal médico. Ademais desta deficiencia, o aparello presentaba outras que quedaron pendentes de arranxar, unha delas a instalación de unha caixa de comunicacións.
Ademais do propio incumprimento do contrato, esta circunstancia supón un prexuízo para os usuarios e usuarias do Servizo Galego de Saúde que quedarán privados deste medio de atención ás emerxencias durante 4 días.
Agardase que o mesmo ocorra co helicóptero con base en Ourense en próximas datas.
A CIG denuncia que Lucus Logística aínda non abonou a nómina de marzo ao seu persoal
A CIG denuncia que a empresa Lucus Logística SL, que se encarga da xestión das bases de ambulancias do servizo de transporte urxente do 061 das localidades de Navia de Suarna, Palas de Rei, Guitiriz, Sarria, Becerreá e Pedrafita do Cebreiro non lles abonou aínda aos seus 50 traballadores e traballadoras a nómina do mes de marzo.
Para o secretario da FGAMT-CIG de Lugo-A Mariña, Christian López, esta noticia resulta preocupante polo incumprimento contractual e polas derivacións e implicacións "que poidan ter as persoas representantes desta empresa" no actual proceso de adxudicación do servizo do transporte sanitario urxente.
Por iso, a CIG insta a que se garanta o pago dos salarios periodica e puntualmente, e que se cumpra co recollido no convenio sectorial. E de igual xeito, insta a Xunta de Galiza para que se interese no seguimento desta situación de precariedade na prestación do servizo "que pode repercutir na calidade do servizo que deben recibir as persoas usuarias do SERGAS"
A FGAMT-CIG denuncia que os recortes na ambulancia de Marín incrementou os tempos de resposta máis do que recomendan os expertos
A central nacionalista sostén que no último mes houbo tres emerxencias con resultado de morte por cardiopatía que non foron ben atendidas
A FGAMT-CIG de Pontevedra denunciou onte en rolda de prensa que no último mes producíronse tres emerxencias en Marín con resultado de morte por problemas cardiovasculares e que nas tres ocasións os tempos de resposta das ambulancias superaron o que recomendan os expertos. A central nacionalista esíxelle á Consellería de Sanidade que dea marcha atrás na decisión de deixar á localidade pontevedresa sen vehículo médico entre as 22.00 e as 10.00 horas.
O representante da FGAMT-CIG Xabier Aboi explicou que a a primeira das emerxencias tivo lugar o pasado 31 de agosto e que a pesar de que nesa data a ambulancia aínda operaba en horario completa “atopábase en Pontevedra facendo un servizo”. Indica que ese día o tempo de resposta dende que se recibiu o aviso até que o paciente foi atendido foi de 18 minutos. O seguinte incidente produciuse o 13 de setembro, co recorte xa aplicado, e nesa ocasión constatouse un tempo de resposta de 23 minutos. Na terceira emerxencia, esta mesma fin de semana, foi de 15 minutos. “Pensamos que non houbo unha atención correcta porque os informes técnicos falan de que en caso de ataques cardíacos ou patoloxías similares se o tempo de resposta e superior aos 10 minutos existen moi poucas probabilidades e que o paciente sobreviva”, detalla Aboi.
Diante disto, a FGAMT-CIG reclama a reposición do servizo e que se fagan públicas as conversas gravadas entre o persoal de emerxencias para determinar cal foi o tempo de activación e de resposta, así como as unidades mobilizadas e o resultado final. Ao mesmo tempo, demandan que se traslade á opinión pública “o contido das conversas entre os servizos médicos das ambulancias e os da sede central do 061 en Compostela”.
Éxito da concentración do venres
Aboi aproveitou a comparecencia para felicitar os veciños e veciñas de Marín que acudiron en masa á concentración convocada o pasado venres para rexeitar a decisión da Consellería e reclamar a restitución do servizo de ambulancias. Tamén denunciou que esta redución de horario pasará das 12 horas actuais a 13 despois de que Sanidade dese a orde de que a ambulancia de Marín debe pernoctar en Pontevedra, “o que significa que se perde unha hora máis entre a ida e a volta”. Finalmente, indicou que recolleron 5.000 novas sinaturas contra a decisión da Xunta, o que suma xa máis de 14.000 apoios.
A nova Plataforma en Defensa da Sanidade Pública de Marín convoca unha manifestación contra o recorte do servizo de ambulancias
A mobilización saíra da Alameda o vindeiro venres día 16 de setembro a partir das 20.30 horas
Distintos colectivos e asociacións de Marín acordaron o pasado mércores constituír unha Plataforma en Defensa da Sanidade Pública que se adherirá a SOS Sanidade Pública e reclamará un hospital único para Pontevedra. O novo colectivo, do que tamén forma parte a CIG, convocou unha manifestación para o venres día 16 de setembro co obxectivo de esixirlle á Consellería de Sanidade que manteña o servizo de ambulancias como até o de agora.
A actividade da Plataforma centrarase nos seus primeiros días de vida en rexeitar os recortes previstos na ambulancia do 061 na localidade pontevedresa, que estará só 12 horas de servizo en lugar das 24 actuais. Ao mesmo tempo, reclamarán a construción do Centro de Saúde de Marín, “que leva xa un atraso de dous anos dende que o Concello puxera os terreos a disposición da Xunta”, indican dende o colectivo.
Todos as asociacións e colectivos interesados en formar parte da iniciativa terán até o venres 16 de setembro para comunicar a súa intención de integrarse na Plataforma que velará polos dereitos sanitarios da veciñanza de Marín.
A FGAMT-CIG cualifica de éxito a folga de ambulancias a pesar dos abusivos servizos mínimos decretados pola Xunta
O persoal do sector realizou caravanas de vehículos, reparto masivo de folletos informativos e concentracións nas principais cidades
A FGAMT-CIG cualificou de “éxito” a xornada de folga no sector das ambulancias, convocada para este xoves 8 de setembro en contra dos recortes no servizo de transporte sanitario urxente decretados pola Xunta. E iso a pesar dos abusivos servizos mínimos estabelecidos pola Consellaría de Sanidade, que marcou a actividade do 100% na atención urxente do 061 e no servizo de diálise e oncolóxico e dun 50% nos traslados inter e intrahospitalarios. O paro, que se desenvolve sen incidentes, está secundado pola práctica totalidade dos traballadores/as non destinados a servizos mínimos.
O secretario do sector de Transportes da FGAMT-CIG, Xesús Pastoriza, subliñou na rolda de prensa ofrecida polas centrais sindicais en Ferrol que as protestas contra os recortes nos servizos de ambulancias comezaron hai un ano, cando os sindicatos se mobilizaron en rexeitamento da modificación do Real Decreto que regula o transporte sanitario. “Daquela xa advertíamos do recorte que se ía aplicar na prestación de servizos, para o que os cambios no RD puxeron a base legal”, apuntou.
Hai unhas semanas a Consellaría de Sanidade anunciaba os primeiros axustes na atención urxente prestada a través do 061, efectivos a partir do sábado 10 de setembro: desaparición dunha ambulancia en Foz, supresión do servizo nocturno en Ponteareas, Baiona e Marín e eliminación da actividade nocturna as fin de semana dun dos vehículos de Vigo. “Estes son os primeiros recortes, pero non serán os últimos”, advertía Pastoriza, quen aseverou que as organizacións sindicais teñen noticia de que haberá novos recortes no transporte urxente e unha redución de prestacións “brutal” nos servizos non urxentes.
Sobre este punto, o responsábel de Seguridade e Saúde da FGAMT-CIG, Ernesto López Rei, matizaba na rolda ofrecida ás portas do Hospital Materno-Infantil da Coruña, que nos atopamos ante “unha administración mentireira que ten como único obxectivo eliminar os servizos públicos básicos”. Rei lanzaba estas acusacións referíndose á situación paradoxal na que se ten posto a propia Consellaría ao decretar uns servizos mínimos para a folga que van ser superiores aos servizos completos achegados a partir do próximo sábado. “A partir do día 10, a administración deixará descubertos servizos que hoxe considera esenciais”, criticou.
Nesta mesma liña expresábase o secretario comarcal da FGAMT-CIG de Ferrol, Alexandre Romero, quen afirmou que “non se pode consentir que sexa a cidadanía a que pague as consecuencias da crise”. Romero indicou tamén que estes recortes non son senón unha desculpa do goberno galego para avanzar no camiño da privatización dos servizos públicos, polo que advertiu que “coa saúde non se xoga”.
Dende a FGAMT-CIG reiteraron que os recortes xa acometidos empeoran un servizo que non cumpre sequera as recomendacións da Organización Mundial da Saúde que aconsella unha ambulancia de "Soporte Vital Básico" por cada 25.000 habitantes e unha ambulancia de Soporte Vital Avanzado por cada 120.000 habitantes. Unha rateo que cidades como Vigo ou Pontevedra superan amplamente. “Isto xa non é pasar ao segundo mundo, senón directamente ao terceiro”, aseveraba o responsábel de Transportes da CIG, Xesús Pastoriza.
Pola súa banda, Christian López Carmona, Secretario Comarcal da FGAMT-CIG en Lugo, insistía nesta cuestión ao asegura que “estes recortes, non teñen xustificación técnica e responden á política de desmantelamento de servizos públicos que está a levar a cabo o goberno do PP amparándose na crise”
Unha medida con consecuencias laborais
A FGAMT-CIG oponse de xeito frontal a esta rebaixa na calidade dos servizos básicos á cidadanía, mais advirte das consecuencias que a medida terá no ámbito laboral. Segundo os cálculos realizados pola Federación da CIG no prazo dun ano poderían desaparecer un terzo dos postos de traballo que actualmente existen neste sector.
Neste senso, López Carmona sinalou á difícil situación laboral que promoveu a patronal do transporte de enfermos e accidentados no ámbito galego, ao negárense a asinar a revisión salarial comprometida no anterior convenio colectivo autonómico para o sector, con vixencia até o 31 de decembro de 2010. “O obxectivo da folga é o freo do recorte de servizos anunciado pola Consellaría e a obriga de asinar as táboas salariais e sentar a negociar o seguinte convenio colectivo por parte da patronal”.
Caravanas de vehículos e protestas nas cidades
Aproveitando a xornada de folga e co obxecto de dar maior visibilidade a un paro desvirtualizado polos abusivos servizos mínimos, traballadores/as e sindicalistas promoveron caravanas de vehículos que percorreron os distintos centros de saúde. Ademais realizouse un reparto masivo de folletos informativos para explicar á cidadanía as consecuencias do recorte nos servizos prestados polas ambulancias.
No caso de Vigo celebrouse unha manifestación que percorreu as principais rúas da cidade e na que participaron máis de 300 traballadores e traballadoras, así como representantes sindicais. A marcha rematou diante da delegación provincial do Sergas, onde os afectados mantiveron unha entrevista coa súa responsábel. “O único que fixo foi tomar nota das nosas reivindicacións para trasladarllas aos responsábeis autonómicos”, comentan dende a FGAMT-CIG de Vigo. Os representantes sindicais tamén solicitaron unha entrevista coa propia conselleira de Sanidade para que lles traslade en persoa os motivos que levaron ao seu departamento a recortar os servizos.
Novo calendario de mobilizacións
Dende a CIG lanzouse unha chamada á Xunta de Galiza para que dea marcha atrás neste novo ataque aos servizos públicos e paralice os recortes anunciados. No caso contrario, os sindicatos advirten que a vindeira semana manterán novas xuntanzas para elaborar un calendario de mobilizacións “que será moito máis duro”.
Traballadores do sector de ambulancias concéntranse diante da Fundación 061 en Compostela en contra dos recortes do servizo
Mantense a convocatoria de folga para o vindeiro día 8 de setembro
Traballadores do sector de transporte de enfermos e accidentados en ambulancia concentráronse este luns diante da sede da Fundación do 061 en Conxo, Compostela, para manifestar a súa oposición á decisión de recortar o servizo. A concentración coincidiu coa xuntanza á que foron convocados os representantes sindicais, onde se lles comunicou o alcance da, segundo a administración, “reorganización” imposta. A semana pasada xa se entregaron 8.600 sinaturas en Marín contra o anuncio de eliminar unha ambulancia, durante 12 horas, e celebrouse unha concentración á que asistiron unhas 2.000 persoas.
A reunión, que se prolongou durante dúas horas, tivo un carácter meramente informativo, xa que a decisión de recortar o servizo adoptouse de xeito previo e sen negociación por parte da Xunta. Segundo explicou Ernesto López Rei, da FGAMT-CIG, o director da Fundación Pública Urxencias Sanitarias de Galicia – 061 afirmou que a convocatoria aos sindicatos veu motivada para evitar que circule información non veraz, “mais nin sequera nos concretou cales van ser os recortes a aplicar, polo que entendemos que os datos manexados polas centrais sindicais son os correctos”.
Os recortes no servizo de transporte urxente, que o Goberno galego cualifica de “reorganización”, baséanse nun suposto estudo do número de movementos de noite e día, así como nos tempos de resposta e as posibilidades de cobertura do servizo por ambulancias doutras zonas. Non obstante, apunta López Rei, o director da Fundación negouse a facilitar dito estudo ás organizacións sindicais alegando que este só podía ser entregado pola Consellaría e mesmo declinou concretar se haberá novos recortes.
Neste senso, o representante da FGAMT-CIG, xa advertiu da posibilidade dunha severa redución no transporte sanitario non urxente, ante a noticia de que se está a avaliar a integración deste servizo na Fundación 061 e da necesidade dun estudo en profundidade sobre o funcionamento deste transporte.
Mobilizacións en Marín
En Marín celebrouse a semana pasada unha concentración na que participaron arredor de 2.000 persoas. Unha mobilización que viu precedida por unha campaña previa de sensibilización e recollida sinaturas, das que as primeiras 8.600 xa foron entregadas o pasado xoves. Xabier Aboi, da FGAMT-CIG, explica que a poboación en Marín está moi desgustada coa decisión de eliminar a ambulancia durante 12 horas. “Sospeitamos que é das 8 da tarde ás 8 da mañá, ao igual que en Baiona. O máis grave é que aínda quedan novos recortes nos que virían máis ambulancias do 061 pero fundamentalmente as que serven ao transporte de diálise e mesmo quitar das medicalizadas o axudante”.
Aboi afirma que estamos ante un recorte dunha prestación pública que “funciona ben” e entende que a decisión de recortar este servizo “resposta á intención deste goberno de recortar os servizos básicos, fundamentalmente á saúde e ao ensino”.
Canto ao emprego, o representante da FGAMT-CIG denuncia que xa hai un primeiro traballador despedido a consecuencia desta situación, en Ponteareas.
A FGAMT-CIG denuncia o recorte de cinco ambulancias do 061 en Baiona, Ponteareas, Marín, Vigo e A Mariña
Vigo quedará con dúas ambulancias medicalizadas e dúas asistencias, malia a súa poboación, fronte á Coruña que mantén 2 medicalizadas e 3 asistenciais
A FGAMT-CIG vén de denunciar o recorte de cinco ambulancias do 061, que son as que se encargan de atender as urxencias, os accidentes, infartos... en toda Galiza. Recortes que afectarán a Baiona, Ponteareas, Marín, Vigo e a Mariña lucense. Xabier Aboi, da FGAMT-CIG denuncia que esta decisión é consecuencia dos recortes anunciados pola Xunta de Galiza e plasmados no Decreto de Transporte Sanitario, que xa fora denunciado hai un ano, cando aínda estaba en fase de borrador. Uns recortes que non teñen xustificación e que terán "graves consecuencias" para a calidade e cantidade dos servizos públicos prestados polas ambulancias no noso país.
Aboi advirte que, segundo a información á que tivo acceso a CIG, estes recortes son os primeiros que se realizan pero están previstos máis para final de ano, tal e como foi comunicado á patronal.
O representante da FGAMT-CIG alerta tamén do que supón para Vigo, unha das cidades máis poboadas de Galiza, eliminar unha ambulancia asistencial -que entrara en funcionamento hai apenas 6 meses- deixándoa só con 2 medicalizadas e 2 asistenciais. Fronte a isto, sinala que A Coruña, cunha poboación semellante, mantén as 2 ambulancias medicalizadas e 3 asistenciais.
Aboi asegura que estes recortes son “inxustificados” e que “é máis custoso para as arcas públicas a ambulancia que se asigna a Sanxenxo durante o verán para atender aos turistas que manter durante todo o ano as demais”.
Previsións do Decreto
O decreto de transporte sanitario prevé, tal e como se denunciou cando foi presentado como borrador, a eliminación da presenza do/a técnico-axudante nas ambulancias medicalizadas, a creación de ambulancias sanitarias, a supresión do uso universalizado destes vehículos e a eliminación da obrigatoriedade de pago, por parte do Sergas, o que, segundo se advertía, abre a porta ao sistema do copago.
Este decreto responde, segundo a FGAMT-CIG, á política de desmantelamento dos servizos públicos que está a levar o goberno do PP adiante, sob pretexto da crise.
Diante desta situación, a CIG convocará para o vindeiro mércores unha xuntanza cos seus delegados/as para avaliar a situación e as consecuencias que terán, tanto esta decisión, como o anuncio de próximos recortes e contactará co resto de organizacións sindicais para iniciar mobilizacións. “Non vale negociar porque o recorte xa está en marcha”, sentenza Aboi.
I feel so free!