Buscar novas
O TSXG da a razón a CIG-Saúde e anula a mobilidade interna voluntaria de persoal non sanitario de 2019
A Fundación Pública “Urxencias Sanitarias de Galicia-061” convocou en 2019 un procedemento de mobilidade voluntaria de persoal non sanitario fixo na que excluía 2 prazas do grupo administrativo da función administrativa: a da secretaría de Xerencia e a da secretaría de Dirección de Xestión e Servizos Xerais. A CIG-Saúde presentou recurso de alzada contra esta convocatoria ao considerar que non se podían excluír as prazas xa que eran de carácter básico.
Ante o silencio da administración a CIG-saúde interpuxo demanda diante do Xulgado do Contencioso administrativo nº 1 de Santiago que ditou sentenza a favor da administración, validando os argumentos desta sobre a falta de representatividade do Delegado Sindical da CIG-Saúde para presentar a reclamación, sen entrar no fondo da demanda.
A CIG-Saúde co fin de defender os seus interese e o do conxunto dos traballadores presentou recurso de apelación diante do TSXG.
O TSXG en sentenza do 17 de abril do 2024 ven de dar a razón a CIG-Saúde tanto na forma como no fondo do asunto. Así declara que o delegado sindical da CIG-saúde estaba lexitimado para presentar o recurso contra o proceso e entrando no asunto indica que a dirección do 061 non podía excluír as 2 prazas do grupo administrativo da función administrativa de carácter básico do proceso.
Sobre o argumento da dirección do 061 en relación a que as prazas excluídas poderían ser obxecto dunha convocatoria para su provisión, a través del sistema de libre designación de forma similar a como se veñen cubrindo as secretarias de Dirección en el SERGAS, o TSXG sinala que esa conversión de prazas básica a prazas de libre designación non se tiña, nin ten feito a dia de hoxe.
Finalmente, a sentenza do TSXG ordena a retrotracción del procedemento de mobilidade interna voluntaria, para incluír todos los postos vacantes.
Sanidade non garante o pago de salarios do persoal de Ambulancias do Atlántico, que irá á folga
A empresa concesionaria do 061 en Vigo, Cangas e Moaña renuncia aos contratos coa Administración e anuncia a súa intención de entrar en concurso de acredores
Na xuntanza mantida o pasado venres entre altos cargos da Consellería, Sergas e 061 coa representación do comité de folga da CIG, CCOO e USO non se garantiu o abono dos salarios pendentes ao persoal de Ambulancias do Atlántico, concesionaria do servizo de transporte urxente en Vigo, Cangas e Moaña e do non urxente en toda a área sanitaria. En consecuencia, o persoal manterá as dúas xornadas de folga previstas para os días 2 e 3 de maio se antes deste mércores día 1 non perciben os soldos que se lles adebedan.
Os responsábeis autonómicos insistiron en que “non queren oír falar” de asumir a xestión directa do servizo público de transporte sanitario e manifestaron que o pago directo das nóminas por parte da Consellería non é unha opción viábel. En todo caso, calquera solución pasa por contar con outra empresa concesionaria que asuma o servizo.
Recoñeceron que a solución proposta pola Consellería a semana pasada de adiantar o diñeiro da facturación mensual ao empresario Carlos Simón para que puidese pagar as nóminas non era xa unha opción polo perigo de que o diñeiro volvese desaparecer das contas da empresa. Algo que xa advertiran os representantes sindicais.
Polo tanto, a única saída para o Sergas é a de intervir temporalmente a empresa Ambulancias do Atlántico mentres se pon en marcha un procedemento urxente de licitación para designar unha nova concesionaria que se faga cargo do servizo.
O procedemento de intervención pública consiste no nomeamento dunha persoa como interventora que será designada polo ente público para que actúe xestionando a empresa. Este proceso xa está acordado para o servizo urxente dende o pasado luns e a previsión da Xunta é que o nomeamento se faga efectivo hoxe mesmo. Sen embargo, para o servizo programado haberá que agardar até o 6 de maio.
Perda de tempo do Sergas
Representantes do comité de folga da empresa Ambulancias do Atlántico acusaron ao Sergas de perder un tempo crucial intentando negociar co empresario Carlos Simón e a súa contorna en lugar de iniciar de inmediato a intervención pública da empresa.
Pese á renuncia oficial efectuada por Ambulancias do Atlántico a todos os contratos públicos coa Administración e aos esforzos da Consellería de Sanidade de nomear a figura dun interventor público na empresa que poida dirixir os cartos do Sergas ao abono das nóminas do persoal traballador, non existen garantías de que isto poida ser así debido a situación de insolvencia da empresa.
Representantes de CIG, CCOO e USO teñen a sospeita fundada de que en canto o diñeiro público volva entrar nas contas da empresa será automaticamente dirixido ao pago dalgún embargo dada a situación actual de quebra económica. Compre lembrar que na actualidade Ambulancias do Atlántico adebédalle dous meses á Seguridade Social e ten impagos de centos de miles de euros con entidades bancarias, empresas de renting de ambulancias, subministradoras de combustible ou compañías aseguradoras, entre outras moitas.
Nova desaparición do propietario
Durante esta semana, tanto responsables da Consellería como representantes da empresa indicaron á representación de CIG, CCOO e USO que o empresario Carlos Simón volveu “marchar” abandonando as súas responsabilidades na xerencia da empresa, deixando un poder especial para a Administración a unha traballadora e nomeando ao seu irmán e tamén empresario Óscar Simón como único interlocutor válido da empresa. O seu irmán explicou que Carlos Simón volve a estar novamente fora de Galiza e que se atopa, unha vez máis, incapacitado para calquera toma de decisións.
Óscar Simón comunicou á Consellería de Sanidade que conta co seu compromiso persoal para facilitar o proceso de transición no cambio de empresa licitadora e para garantir o abono no pago de salarios, pero matizou que en ningún caso se poderá contar co seu compromiso patrimonial para estes fins.
A nova fuxida do empresario e o cambio de interlocutor na empresa, non lle dá ningún tipo de confianza nin de garantías á representación do persoal. De feito, non fai máis que empeorar as cousas posto que o tamén empresario de ambulancias, Óscar Simón, está a ser investigado dende marzo de 2023 polos Mossos d'Esquadra e a Garda Civil e interrogado pola Audiencia Nacional no marco dunha operación anticorrupción nas ambulancias catalanas por unha suposta alteración da licitación pública en Catalunya, cando era socio do seu irmán na mesma empresa.
Folga e ultimato á Xunta
O persoal traballador de Ambulancias do Atlántico acordou o venres en asemblea que a folga convocada para os días 2 e 3 de maio non se paralizará a non ser que a totalidade das nóminas de abril estean abonadas antes do día 1 de maio, tal e como esta acordado coa empresa concesionaria.
Advirten que a situación é totalmente insostible e que de non cumprir estes prazos enfrontaranse a unha folga “dura” con mobilizacións nas que contarán co persoal doutras áreas sanitarias que xa anunciaron a súa presencia en Vigo para colaborar de forma solidaria nas protestas.
Así mesmo, a concentración prevista para o vindeiro xoves 2 de maio diante da sede do Sergas en García Barbón non se cancelará aínda que o persoal cobre as súas nóminas, posto que os incumprimentos graves en material laboral así como outras débedas económicas continúan sen resolverse.
En previsión de que o conflito se estenda no tempo, as centrais sindicais de CIG, CCOO e USO comezaron dende onte a recadar cartos entre o persoal para a creación dunha caixa de resistencia que poida paliar o impacto económico das persoas traballadoras que secunden a folga.
O persoal de Ambulancias Casablanca acorda iniciar mobilizacións ante o deterioro das condicións de traballo
Denuncian os incumprimentos da empresa, despedimentos e presións
Os traballadores de Ambulancias Casablanca, SL decidiron en asemblea iniciar mobilizacións ante os sucesivos incumprimentos e deterioro das condicións de traballo nesta empresa. As datas concretaranse nos vindeiros días, pero xa advirten que “rematarán na convocatoria dunha folga e mobilizacións en toda a UTE se non se soluciona este conflito”.
Ambulancias Casablanca forma parte dunha UTE con Ambulancias do Cantábrico (de HTC Group) e realiza o transporte sanitario non urxente da área sanitario de Santiago, dependente do SERGAS.
Segundo explica o representante da FGAMT-CIG de Compostela, Inácio Pavón, durante anos foi a acción sindical quen foi conseguindo que unha das empresas nas que peores condicións de traballo había, fora aceptando que tiña que cumprir como as demais. “Isto custou moitas horas de negociacións, pero tamén denuncias e acción sindical para que, arrastrando os pés, foran cumprindo. E unha vez máis volven deixar de lado os acordos, o que levou a esta situación e que cadro de persoal tivera dito que xa abonda”.
Por iso, esta mañá compareceron os delegados de Ambulancias Casablanca, os delegados de Ambulancias do Cantábrico e o responsable da FGAMT-CIG de Santiago para facer públicas as reivindicacións e anunciar o inicio de mobilizacións.
Sospeitas de contratación de familiares sen titulación
Pavón sinala que ás portas dun novo concurso público “atopámonos con que novamente se incumpren os acordos de contratación -polos cales se respectarían as antigüidades e se cubrirían os postos fixos con traballadores e traballadoras indefinidas- e se despide traballadores para contratar outros aos que se lles advirte que non deben de falar coa representación sindical”. Apunta que “mesmo hai sospeitas fundadas, e que serán postas nas mans da fiscalía nos próximos días, de que se contratou familiares sen titulación e que esta foi falsificada”.
O representante da FGAMT-CIG de Compostela denuncia que os traballadores despedidos fórono “por ter solicitado a limpeza dos seus uniformes”, como o resto de traballadores e como é obrigatorio por parte das empresas ao tratarse dun servizo onde existe un risco biolóxico, e “por terse afiliado ao sindicato”.
Os delegados de persoal denuncian presións por parte do encargado aos máis novos para que non rexistren as horas extras, non deixen uniformes para lavar ou se relacionen coa representación sindical. Ademais de ser habitual chamar fora das horas de traballo e cambiar permanentemente o cuadrante de traballo sen informar á representación sindical.
Sen a titulación necesaria
Tamén denuncian que os servizos UVI, que ten esta empresa na súa parte da concesión da UTE, se están a realizar servizos con traballadores sen a titulación necesaria o que é directamente ilegal e que tamén é responsabilidade do Sergas e do 061 por non levar un control sobre esta práctica fraudulenta e que pon en risco as vidas das persoas.
Outra das demandas dos traballadores é sobre o estado das ambulancias sobre as que non se realiza os mantementos nin tan sequera as limpezas adecuadas, co conseguinte risco para os traballadores e usuarios e usuarias, como un claro deterioro do servizo que se presta. “Falamos de escalóns que directamente se lles arrincan ás ambulancias porque non se reparan ou de ancoraxes de cadeiras de rodas en mal estado”, explican.
Non existe ademais no centro de traballo un espazo axeitado para a limpeza e desinfección das ambulancias tras a denuncia da veciñanza porque se estaban facendo directamente na rúa.
A CIG-Saúde denuncia o incumprimento, unha vez mais, do contrato de servizo de transporte sanitario aéreo do 061
O helicóptero con base en Santiago estará inoperativo do 15 ao 19 de abril
A CIG-Saúde vén de denunciar que o helicóptero medicalizado con base en Santiago H3 está inoperante dende onte luns 15 de abril, ás 13:00 horas, e que non se agarda que volva estar operativo até o venres día 19 deste mes. Aínda que os pregos do servizo establecen que a empresa adxudicataria debe dispor dun aparello de substitución, ELIANCE HELICOPTER GLOBAL SERVICES, S.L. non vai cumprir está cláusula dos pregos.
A CIG-Saúde sinala, ademais, que está inoperatividade non está causada por un imprevisto senón que se trata dunha intervención programa para a instalación dunha caixa de comunicación que os pregos establecen como obrigatoria.
Esta situación dáse no marco temporal de cambio de contrato do servizo de transporte sanitario urxente aéreo da FPUSG-061. O novo contrato foi formalizado o pasado 18 de marzo 2024, despois de que a primeira licitación quedará deserta e se volvera a licitar o mesmo servizo por 3 millóns mais de euros.
O aparello en cuestión chegou á base de Santiago en febreiro coa intención de quedar xa para prestar servizo co novo contrato, pero estivo inoperante debido a que non había espazo suficiente no asento do persoal médico. Ademais desta deficiencia, o aparello presentaba outras que quedaron pendentes de arranxar, unha delas a instalación de unha caixa de comunicacións.
Ademais do propio incumprimento do contrato, esta circunstancia supón un prexuízo para os usuarios e usuarias do Servizo Galego de Saúde que quedarán privados deste medio de atención ás emerxencias durante 4 días.
Agardase que o mesmo ocorra co helicóptero con base en Ourense en próximas datas.
A CIG denuncia que Lucus Logística aínda non abonou a nómina de marzo ao seu persoal
A CIG denuncia que a empresa Lucus Logística SL, que se encarga da xestión das bases de ambulancias do servizo de transporte urxente do 061 das localidades de Navia de Suarna, Palas de Rei, Guitiriz, Sarria, Becerreá e Pedrafita do Cebreiro non lles abonou aínda aos seus 50 traballadores e traballadoras a nómina do mes de marzo.
Para o secretario da FGAMT-CIG de Lugo-A Mariña, Christian López, esta noticia resulta preocupante polo incumprimento contractual e polas derivacións e implicacións "que poidan ter as persoas representantes desta empresa" no actual proceso de adxudicación do servizo do transporte sanitario urxente.
Por iso, a CIG insta a que se garanta o pago dos salarios periodica e puntualmente, e que se cumpra co recollido no convenio sectorial. E de igual xeito, insta a Xunta de Galiza para que se interese no seguimento desta situación de precariedade na prestación do servizo "que pode repercutir na calidade do servizo que deben recibir as persoas usuarias do SERGAS"
CIG-Saúde da Coruña presenta a candidatura para as eleccións sindicais que o vindeiro 5 de maio se celebrarán no Sergas
Destaca a importancia deste proceso nun momento de grave recorte de dereitos laborais e ataques á sanidade pública
A CIG-Saúde da Coruña deu a coñecer esta mañá en rolda de prensa a candidatura e o programa que vai presentar ás eleccións sindicais na área sanitaria, que se celebrarán o vindeiro 5 de maio. Eleccións que, lembraron, se realizan nun momento de grave recesión dos dereitos da clase traballadora e diante da progresiva aplicación de políticas de privatización da sanidade pública, que merman a capacidade asistencial e ameazan a viabilidade e supervivencia do sistema sanitario.
María Jesús Seijo García (enfermeira na Unidade de Coidados Paliativos e Continuos do CHUAC), Rafael Rodríguez Méndez (celador de Urxencias do CHUAC), Ana Lestón Gallardo (enfermeira no Hospital Virxe da Xunqueira de Cee) e Ramón Veras Castro (médico de Familia do Centro de Saúde San Xosé), as/os catro primeiros membros da lista, foron as persoas encargadas de dar a coñecer a candidatura e o programa coa que a CIG-Saúde se presenta ás vindeiras eleccións sindicais no Sergas.
A cabeza de lista, María Seijo, destacou a importancia que ten este proceso electoral tanto para o persoal do Sergas como para o conxunto da cidadanía, pois nesta situación de recorte de dereitos e ameazas á sanidade pública, “é máis necesaria ca nunca a presenza sindical da CIG, que ten amosado con claridade e contundencia o seu compromiso coa sanidade pública e que non dubida á hora de defender os dereitos dos/as traballadores/as nin de denunciar e combater a política sanitaria que o PP e os seus responsábeis sanitarios están a practicar”.
A ameaza da iniciativa privada
Neste senso, Ramón Veras apuntou que a introdución da iniciativa privada na sanidade pública “é a ameaza máis seria para a viabilidade económica e financeira do sistema sanitario”. Este modelo de financiamento e xestión privada xa está implantado en Madrid ou Valencia, autonomías onde amosou ser un rotundo fracaso, e no caso galego, o goberno do PP vén de aplicalo no futuro novo hospital de Vigo e agora tamén nos centros de saúde.
Así, explicou, o pasado 7 de abril saía publicado no Diario Europeo a licitación para 18 centros de saúde en todo o País (tres na comarca da Coruña: Arteixo, Culleredo e Cambre) cun orzamento total de 233 millóns de euros. Non obstante, o proxecto inicial, con xestión e financiamento público, contemplaba a construción de 22 centros de saúde por un valor de 32 millóns de euros (Memoria Económica dos Orzamentos 2010). “Este sobreprezo suporá non ter orzamentos para outras cuestións como os servizos ou o persoal”, matizou.
“O voto nestas eleccións é un voto crucial para o futuro do sistema sanitario, porque dependendo da representación sindical haberá unha implicación máis ou menos activa nas plataformas e iniciativas que queren pór freo ás iniciativas privatizadoras”, apuntou Veras. A este respecto, lembrou que dende hai dous anos, a CIG-Saúde, a diferenza doutras organizacións como Satse, CESM, Omega ou CSIF, vén participando e/ou liderando as mobilizacións e plataformas que por toda Galiza se teñen realizado en defensa da sanidade pública.
Sobre este punto, criticou a pouca repercusión mediática que tiveron as multitudinarias manifestacións e protestas desenvolvidas en Galiza nestes anos fronte á difusión que nestes días están recibindo as mobilizacións realizadas en Cataluña.
Recortes na área sanitaria da Coruña
Mentres María Seijo denunciou que, alén da privatización de servizos (non sanitarios e de asistencia sanitaria) e a diminución brutal de investimentos públicos, o goberno do PP adoptou unha serie de decisións que para a área sanitaria da Coruña supoñen unha redución da capacidade asistencial e unha saturación do sistema.
Así referiuse á suspensión do Plan de Mellora, que contemplaba a incorporación de máis persoal; a paralización do Plan Director, cuxa consecuencia máis visíbel atópase no continuado colapso do servizo de Urxencias; ou a redución dos cadros de persoal en moitos servizos, existindo mesmo a pretensión de eliminar tres enfermeiras no Servizos de Dixestivo, no que se atenden os transplantes de hepáticos e no que os/as doentes requiren unha especial atención.
Así mesmo, censurou as “prácticas perversas, cando non ilexítimas”, na contratación do persoal que conducen “á absoluta inestabilidade dos/as profesionais e á precariedade asistencial dos servizos e unidades de hospitais, centros de saúde, 061, etc”.
Incorporación do persoal do Hospital de Cee
Pola súa banda, Ana Lestón, que explicou que o persoal do Hospital Virxe da Xunqueira de Cee participará por primeira vez neste proceso logo de que a Fundación se integrase no Sergas, subliñou que a CIG continuará loitando para que o hospital acade o nivel do resto dos hospitais comarcais do País. Para isto, sinalou, a central sindical seguirá reivindicando a creación da categoría de celador/a (función que agora desempeñan as/os auxiliares de enfermería e as/os enfermeiras/os) e a dotación para o centro de todo o persoal necesario.
Rafael Domínguez lamentou as agresións ás condicións laborais (con novos atrancos para efectivizar os dereitos laborais) e salariais que dende o goberno galego e o español se teñen aplicado contra os traballadores/as do Sergas, o primeiro a través da suspensións dos acordos retributivos e o segundo mediante a rebaixa salarial do 5% e de parte das pagas extraordinarias. Decisións todas contra das que a CIG-Saúde se ten mobilizado.
O persoal de ambulancias está convocado a asembleas para avaliar un novo calendario de protestas contra o deterioro do servizo
As organizacións sindicais alertan das consecuencias que o novo decreto terá na calidade asistencial e non descartan convocar folga no sector
A CIG, UGT e CCOO compareceron este mércores en rolda de prensa para denunciar novamente os recortes que o transporte sanitario está a padecer e alertar das consecuencias que a aplicación do recén aprobado decreto que regula os servizos de ambulancias terá na calidade asistencial e nos postos de traballo. As organizacións sindicais anunciaron a celebración de asembleas de traballadores/as nas sete cidades para estudar un calendario de mobilizacións.
Representantes das tres organizacións sindicais demandaron á Consellaría de Sanidade que atenda ás demandas de solicitude de xuntanza para abordar os recortes que se están a aplicar nos servizos de transporte sanitario e a situación na que vai ficar a asistencia aos cidadáns e cidadás. O responsábel de Transportes da CIG, Xesús Pastoriza, censurou a Consellaría por practicar “a política da avestruz e agochar a cabeza ante os problemas”. Neste senso, apuntou que só caben dúas posíbeis explicacións para a actitude da Consellaría: “ou non saben que política de transporte sanitario seguir máis alá dos continuos recortes; ou ben os recortes que van impor son tan graves que non queren dalos a coñecer até despois das eleccións municipais”.
Pastoriza lembrou que a Xunta ten previsto o peche nocturno das bases do 061 naquelas localidades con menor número de incidencias que as grandes cidades, mentres que até o de agora este servizo se prestaba ininterrompidamente 24 horas aos día 365 días ao ano. De igual xeito, vanse pasar servizos de transporte de doentes que realizaban as ambulancias ao 065 (transporte de dependentes), a pesar de que estes vehículos non están acondicionados nin os/as condutores preparados para este tipo de transporte. E tamén está confirmada a desaparición da figura dos camilleiros/as nas ambulancias medicalizadas, polo que estes vehículos pasarán a contar cun/ha profesional menos.
Durante a comparecencia, Pastoriza criticou con dureza a eliminación no novo decreto da obrigatoriedade de pago do servizo por parte do Sergas (sempre que non fose imputábel a un terceiro, como no caso das compañías aseguradoras), mais sen que se teña determinado como e quen deberá afrontar o custe deste servizo, abrindo así a porta ao sistema de copago. “Un servizo básico á cidadanía como é o transporte sanitario non pode verse afectado polos recortes da Xunta”, aseverou.
Asembleas nas sete cidades
Dende as organizacións sindicais informaron que a semana próxima realizaranse asembleas de traballadores e traballadoras do sector nas sete cidades para avaliar a situación na que se atopa o transporte sanitario e a posibilidade de desenvolver un novo calendario de mobilización no mes de abril. Hai que lembrar que antes da aprobación do Decreto o persoal de ambulancias xa realizara protestas en diferentes puntos do País en contra do deterioro do servizo e na defensa do mantemento dos empregos.
Entre as propostas de mobilizacións estúdase instalar puntos informativos para reparto de folletos á poboación para dar a coñecer os recortes aplicados polo goberno galego e non se descarta a convocatoria de folga no sector.
Novas anteriores relacionadas.
Continúa, pola comarca de Ferrol, a caravana de vehículos en contra do novo decreto que regulará o transporte sanitario
Uns 20 vehículos marchan pola cidade e os concellos de Pontedeume, As Pontes e Narón advertindo da privatización encuberta do servizo de ambulancias
As caravanas de vehículos polas cidades e vilas que estes días a CIG, UGT e CCOO están a desenvolver para alertar á cidadanía sobre os recortes no servizo de ambulancias que, de aprobarse, traerá o novo texto do decreto que regula o transporte sanitario trasladouse na mañá do luns até Ferrol. Alí, uns 20 vehículos participaron nunha marcha pola comarca na defensa deste servizo público esencial e que debería continuar a ser universal.
Por volta das 10:30 horas uns 20 vehículos partían de diante do local sindical da CIG en Ferrol para levar a súa mensaxe contra o borrador do novo decreto do transporte sanitario, xa que consolidará o recorte nos servizos prestado polas ambulancias, suporá unha considerábel perda de empregos no sector e abre o camiño para a implantación dos sistemas de copago. A marcha chegou ás portas do Hospital Arquitecto Marcide, onde fixo unha parada para advertir aos usuarios e usuarias do centro de que, baixo a escusa da crise económica, a Xunta busca unha privatización encuberta do servizo.
A modificación do decreto, subliñaba o Secretario Comarcal da FGAMT-CIG de Ferrol, Alexandre Romero, suporá a eliminación da universalidade do transporte sanitario, ademais de suprimir o servizo do 061 polas noites nas vilas pequenas, eliminar a figura do técnico axudante (destruíndo así postos de traballo) ou anular os servizos interhospitalarios, as altas de doentes, programados, etc. “O servizo de transporte sanitario é un servizo básico e polo tanto ten que ser universal e gratuíto”, aseverou Romero durante a protesta.
Logo de pasar polo Arquitecto Marcide, a caravana continuou o seu camiño cara Fene, Pontedeume, As Pontes e Narón, concellos nos que tamén se realizaron paradas informativas diante dos respectivos centros de saúde. Tres horas despois, a marcha concluída novamente na cidade de Ferrol.
Desconvocatoria da xornada de folga
As centrais sindicais CIG, UGT e CCOO veñen de informar da desconvocatoria da xornada de folga prevista para mañá, mércores 22 de decembro, no sector das ambulancias de Galiza. A suspensión da medida de presión chega logo de constatarse que todas as empresas, agás Emersan Galicia, abandonaron a súa intención de proceder a unha rebaixa salarial e xa abonaron a paga extraordinaria do mes de decembro.
Polo tanto, ao cumprirse o obxectivo da folga carece de sentido manter a convocatoria da mesma.
Non obstante, os sindicatos advertiron que as mobilizacións contra o borrador do novo decreto continuarán adiante nas vindeiras semanas e non se descarta a convocatoria dunha folga xeral no sector.
Traballadores/as das ambulancias percorren o centro de Vigo en caravana para rexeitar o decreto do transporte
A protesta, que causou retencións, foi interrompida tras multar a Policía Local a media ducia de vehículos dos 20 participantes
Os traballadores/as do sector das ambulancias continuaron hoxe coas súas protestas para denunciar que o novo decreto do transporte afectará á calidade do servizo, ademais dos custes laborais que suporá a súa entrada en vigor. A mobilización consistiu nunha caravana de coches que percorreu o centro de Vigo até que a Policía Local multou a media ducia deles por facer soar as súas bucinas e ameazou con estender as sancións aos máis de 20 vehículos participantes no caso de que non disolvesen a protesta.
A marcha partiu do aparcamento da tenda deportiva Decathlon, nas proximidades do hospital Meixoeiro, arredor das 11 da mañá para a continuación percorrer a Avenida de Madrid, Praza de España e Gran Vía. Foi á altura do Concello cando os axentes interceptaron aos vehículos para sancionar aos seus propietarios. Diante das ameazas de seguir coas multas se non disolvían a caravana, os empregados/as das ambulancias optaron por abandonar unha protesta que mañá terá continuidade polas rúas da Coruña. Deste xeito, non puideron rematar o acto na delegación provincial do Sergas na cidade olívica tal e como estaba previsto.
A reivindicación causou algunhas retencións nalgunhas rúas do centro. Todos os vehículos participantes fixeron soar o claxon e portaban carteis sinalando responsabilidade da Consellería de Sanidade no conflito e denunciando que o decreto aumentará a precariedade laboral.
Neste senso, critican que o documento incorpora a posibilidade de suprimir a figura do axudante nas ambulancias medicalizadas, o que repercutirá negativamente na calidade do servizo e suporá a supresión de moitos postos de traballo. O texto tamén suprime as UVIS móbiles dos hospitais e establece o peche nocturno das bases do 061 en determinadas poboacións, en concreto naquelas con menor número de incidencias que as grandes cidades, mentres que na actualidade este servizo préstase ininterrompidamente 24 horas aos día 365 días ao ano.
Finalmente, a protesta tamén ten por obxecto rexeitar a redución de salarios pretendida pola patronal, que xa manifestou a súa intención de facelo nun 10%.
Comezan as mobilizacións contra o recorte dos servizos no transporte sanitario
Traballadores/as de ambulancias de A Coruña ocuparon a Dirección provincial do Sergas
Persoal de ambulancias chegados de toda a provincia de A Coruña ocuparon temporalmente na mañá deste mércores a Dirección provincial do Sergas para amosar o rexeitamento ao recorte do servizo que a Xunta prevé no borrador do Decreto que regulará o transporte sanitario de Galiza. Os traballadores/as advertiron que non van tolerar ningunha rebaixa deste servizo público, a perda de ningún emprego, nin tampouco a baixada salarial, que anunciou hai unhas semanas a patronal.
O acto de protesta realizado esta mañá enmárcase no calendario de mobilizacións que o sector acordou para os vindeiros días contra o recorte no servizo público e a rebaixa salarial do 10% pretendida pola patronal. Deste xeito, esta mesma semana repetiranse as concentracións nas provincias de Pontevedra e Ourense.
Nada máis iniciarse a ocupación do vestíbulo nas dependencias do Sergas, a Directora provincial recibiu a unha representación dos traballadores e traballadoras, aos que lles informou que trasladará á petición de reunión cos responsábeis da Consellaría cursada polas organizacións sindicais.
O Secretario de Transportes da FGAMT-CIG, Xesús Pastoriza, explicaba aos medios que o borrador presentado pola Xunta para modificar o actual decreto que regula o transporte sanitario terá un impacto negativo no emprego, xa que de aquí a un ano poderíanse perder entre o 30 e o 40% dos traballos actuais, por mor, entre outros aspectos, da redución de servizos e a desaparición da figura do/a técnico-axudante nas ambulancias medicalizadas.
A aplicación do novo decreto tamén derivará nunha caída da cantidade e calidade do servizo prestado á cidadanía. Pastoriza advertiu que Xunta tenta suprimir o uso universalizado destes vehículos, posto que co novo decreto só se podería utilizar a ambulancia en caso de risco vital ou cando o/a usuario/a estea imposibilitado para moverse en transporte ordinario.
Ademais, o texto contempla a eliminación da obrigatoriedade de pago por parte do Sergas (sempre que non fose imputábel a un terceiro, como no caso das compañías aseguradoras), mais sen determinar como e quen tería que afrontar o custe deste servizo, abrindo así a porta ao sistema de copago. “Un servizo básico á cidadanía como é o transporte sanitario non pode verse afectado polos recortes da Xunta”, aseverou.
Alén das mudanzas previstas no borrador, Pastoriza subliñou que a Xunta planea tamén pechar durante as noites as bases do 061 nas vilas, suprimir as UVIs móbiles dos hospitais e reducir á metade as ambulancias destes centros.
Este conxunto de recortes, advirte, non teñen xustificación técnica, senón que responden á política de desmantelamento dos servizos públicos que o goberno do PP está a levar adiante, amparándose na situación de crise económica.
Folga contra o recorte salarial
A maiores, o persoal do sector de ambulancias convocará unha xornada de folga o vindeiro 22 de decembro se a patronal finalmente cumpre co anuncio realizado hai uns días a respecto de recortar un 10% os salarios dos traballadores/as. Esta redución materializaríase mediante a suspensión da paga extraordinaria de decembro.
I feel so free!