• 8 Marzo
8 de marzo MULLERES EN FOLGA

A CIG convoca folga de mulleres de 24 horas o vindeiro 8 de marzo de 2021, no Día internacional das mulleres traballadoras.  Sobran razóns para que as mulleres fagamos folga este 8-M, para facérmonos visíbeis na rúa, para reivindicarmos os nosos dereitos, para non darmos nin un só paso atrás na nosa loita. Fagamos ouvidos xordos ás voces que mesmo insinuaron que fomos culpábeis da pandemia, ou das que consideran que nunca é o momento axeitado para facérmonos valer. ÚNETE A NÓS!

[Click para +información]

Milleiros de mulleres participan na folga e nas mobilizacións convocadas pola CIG este 8M

Malia o acoso e a criminalización institucional as traballadoras galegas volven demostrar nas rúas a súa inmensa capacidade de loita

Nacional -

Milleiros de traballadoras de todas as actividades económicas secundan a folga de mulleres e participaron nas mobilizacións convocadas pola CIG neste 8 de Marzo, marcado polas medidas derivadas da pandemia e pola campaña de desmobilización, criminalización e acoso social promovida dende os poderes públicos.

Unha situación malia a que, tal e como afirmou a secretaria das Mulleres da CIG, Margarida Corral, ao remate da mobilización convocada na Coruña, "hoxe demostramos, unha vez máis, e en condicións moi adversas, a inmensa capacidade de mobilización das traballadoras galegas, convocando 31 accións combativas nunha chea de localidades do país, porque non imos permitir que as mulleres paguemos a crise sanitaria co noso lombo, co noso traballo de balde, limpando, coidando e curando".

Arranca a folga de mulleres marcada polos abusivos servizos mínimos e o brutal boicot institucional

A CIG ten convocadas 31 mobilizacións por todo o país durante este 8 de marzo

Nacional -

As primeiras horas da folga de mulleres deste 8 de Marzo están marcadas polos abusivos servizos mínimos decretados en sectores como a sanidade ou os coidados, que exceden con moito a actividade que, mesmo nesta situación de pandemia, se establecen para un domingo ou un festivo, máis tamén pola combatividade do feminismo de clase. Piquetes da CIG percorreron de madrugada o polígono das Gándaras no Porriño, con paradas en Alonarti Envases e no Centro Industrial de Pescanova, compañía na que a central sindical denunciou un caso de abuso sexual a unha empregada.

O Concello da Coruña pretende conculcar os dereitos fundamentais das súas traballadoras

O Goberno municipal asegura descoñecer a convocatoria de folga de mulleres do 8 de marzo

A Coruña -

O Concello da Coruña pretende vulnerar o dereito fundamental á folga das súas traballadoras ao asegurar que descoñece a existencia da convocatoria de folga de mulleres para o 8 de marzo. Esta actuación do Goberno municipal, que se enmarca na campaña de boicot, persecución, criminalización e invisibilización da loita feminista, é unha forma de machismo institucional que a CIG non vai consentir, e por iso denunciará a gravidade destes feitos alí onde corresponda.

A CIG recorre os “inauditos” servizos mínimos decretados para impedir o dereito á folga das mulleres o 8M

Corral denuncia a “brutal” campaña de acoso á loita feminista e o intento de invisibilizar a folga por parte das institucións

Nacional -

A CIG vén de recorrer os “máximos e exaxerados” servizos mínimos decretados pola Xunta de Galiza para a Folga de Mulleres convocada para o vindeiro 8 de marzo. Denuncia que malia a convocatoria de folga terse rexistrado o pasado día 27 de xaneiro, non se convocou a xuntanza para a negociación dos mínimos até o día 24 de febreiro, un mes despois. Considera ademais “impresentábel” que a Xunta de Galiza agardara ao último día hábil para publicar o Decreto de servizos mínimos. “O obxectivo deste atraso é, como noutras ocasións, dificultar a presentación do recurso e a adopción de medidas cautelares por parte do tribunal”, denuncia a secretaria de Organización, Susana Méndez.

O 100% das novas persoas desempregadas no mes de febreiro foron mulleres

A CIG chama á folga de mulleres e ás mobilizacións convocadas para o 8 de Marzo

Nacional -

» Accede aquí ao especial 8M

A EPA xa adiantaba que o 77% do emprego destruído no ano 2020 fora feminino. Os datos de paro rexistrado do mes de febreiro que veñen de se publicar confirman que esa tendencia continúa e empeora. Tal é así que entre os homes descendeu o desemprego en 1.259 persoas. Porén entre as mulleres rexistráronse 503 paradas máis neste último mes. Isto é, o 100% das novas persoas desempregadas o mes pasado foron mulleres.

A CIG convoca 31 mobilizacións en cidades e vilas de toda Galiza na xornada de folga do 8M

A Secretaría das Mulleres rexeita o intento de criminalizar as mobilizacións do feminismo

Nacional -

» Accede aquí ao especial 8M

A CIG ten convocadas 31 mobilizacións en cidades e vilas de toda Galiza para facilitar a participación de todas durante a xornada de folga de mulleres do 8 de Marzo. Co fin de garantir o cumprimento de todos os requisitos derivados da pandemia, nas asembleas acordouse promover actos a nivel local, evitando desprazamentos, organizar as manifestacións en columnas de mulleres, garantindo a distancia interpersoal de máis de metro e medio, e uso de máscara de protección. A secretaría das Mulleres fai tamén un chamamento a participar nas manifestacións convocadas pola plataforma GALEGAS8M da que a central sindical fai parte.

A CIG denuncia o “inaudito” incremento dos servizos mínimos da Xunta para a Folga do 8M

A pandemia non pode servir de escusa para coartar o dereito á folga das mulleres

Nacional -

» Accede aquí ao especial 8M

A CIG vén de manifestar o seu rexeitamento á proposta de servizos mínimos “abusivos” presentada pola Xunta de Galiza para a Folga de Mulleres convocada para o vindeiro 8 de Marzo na que, ademais, se reforza a presenza de persoal xusto nos sectores máis feminizados. Un texto en “masculino xenérico”, de 250 páxinas, que fixo chegar hai apenas día e medio, o que foi considerado pola secretaria de Organización da central sindical, Susana Méndez, como “unha falta do mínimo respecto e consideración”. Máis cando a convocatoria de folga foi rexistrada hai case un mes, en concreto o 27 de xaneiro.

O VIII Encontro Nacional de Mulleres da CIG avanza os preparativos para a folga de Mulleres do 8 de Marzo

Corral: “Non queda máis camiño que a loita incómoda, ten que haber cambios reais xa”

Nacional -

O VIII Encontro Nacional de Mulleres da CIG reuniuse esta mañá, na recta final cara a folga de Mulleres convocada para o vindeiro 8 de Marzo, para facer unha última posta en común sobre a situación actual e concluír os preparativos de cara a esa data. O encontro viuse reducido en canto a participación por mor das obrigadas limitacións derivadas da situación sanitaria, mais co aforo completo que permitía a sala, aínda que a xuntanza resultou igualmente combativa e participativa que noutras edicións.

As traballadoras galegas tardarán un mínimo de 300 anos en conseguir a equiparación salarial cos homes

Corral chama á folga o 8M porque “os dereitos das mulleres non poden estar en corentena”

Desde o ano 2009 a fenda salarial reduciuse en 2,6 puntos porcentuais, o que en termos absolutos equivale a 150 euros menos de diferenza entre os salarios dos homes e das mulleres. De seguirmos a este ritmo, farían falta 300 anos para conseguir a equiparación salarial cos homes. Un tempo que será mesmo insuficiente se non muda a situación provocada pola covid, que expulsou do mercado laboral a miles de traballadoras galegas que se viron obrigadas a asumir novamente os coidados de dependentes e crianzas. Por iso a CIG chama á folga o 8M, porque “pese á pandemia, os dereitos das mulleres non poden, nin deben, estar en corentena”.

A CIG convoca Folga de Mulleres para o 8 de Marzo

A central fai un chamamento a secundar o paro de 24 horas e a participar nas mobilizacións

Nacional -

Este 8 de Marzo, Día Internacional das Mulleres Traballadoras, a CIG fai un chamamento ás traballadoras galegas a secundar a folga de 24 horas e a participar nas mobilizacións convocadas pola central nacionalista durante esa xornada.

HORARIOS

DOCUMENTOS