Buscar novas
O sector das ambulancias intensifica as mobilizacións para esixir a negociación do novo convenio
A CIG reclama a intervención da Xunta e que traslade a información sobre as renuncias das empresas
Traballadores e traballadoras do transporte sanitario realizaron unha nova concentración para esixir a apertura da negociación do convenio colectivo, rexeitar as pretensións das patronais do sector de aplicar descolgues e reclamar a intervención da Consellaría de Sanidade, tanto para desbloquear a negociación colectiva como para trasladar á representación do persoal toda a información relativa ás renuncias das empresas ao concurso do 061.
A protesta, convocada pola CIG, é a segunda que delegados/as e traballadores/as de ambulancias realizan esta semana, xa que no día de onte houbo unha mobilización en Compostela e ademais, mañá mércores, está convocada unha nova concentración no Hospital Álvaro Cunqueiro de Vigo, ás 11:00h.
As empresas solicitan a inaplicación do convenio
Segundo explica Xesús Pastoriza, responsábel do sector de transportes da CIG, con estas protestas quérese amosar o rexeitamento ao bloqueo patronal á negociación do convenio colectivo, que leva dous anos caducado. Pastoriza puxo o acento na situación complexa do transporte sanitario, xa que no último concurso público moitas empresas presentaron ofertas á baixa (houbo casos de compañías que chegaron a rebaixar até un 12% o prezo) e "cando nos sentamos a negociar o convenio, escusáronse en que os concursos non lles daban para cubrir os gastos e paralizaron a negociación".
En Galiza hai arredor de 1.800 traballadores e traballadoras afectadas "que viven nunha situación de intranquilidade e incerteza absoluta", engade Pastoriza, porque ademais de obstaculizar as negociacións, "as empresas solicitaron a inaplicación do convenio vixente. Nalgúns casos, como o de Ambuibérica, coa brutalidade de pedir un 25% de rebaixa salarial, e se non se acepta este recorte dos salarios, a patronal ameaza con despedimentos".
Se ben o representante sindical aseverou que até agora os usuarios e usuarias non se viron afectadas "grazas á profesionalidade dos traballadores/as", tamén advertiu que, a medio prazo, si poderían rexistrarse problemas "porque isto non hai quen o aguante, estanse realizando excesos de xornada de maneira continuada, falta persoal e incluso moitos servizos non están dotados cos medios materiais que establece o contrato".
Diante desta situación, a CIG (que ten a maioría da representación no sector) demanda a intervención da Xunta "que se nega a sentar con nós. Resulta incríbel que nin o 061, nin o SERGAS nin a Consellaría respondan as nosas solicitudes, cando é a administración a que ten a chave para solucionar esta problemática. Pois non hai que esquecer que foi a Xunta quen permitiu que todos eses contratos se fixeran como se fixeron e que chegáramos a esta situación".
Falta de información sobre as renuncias
Pastoriza reclamou a apertura inmediata da mesa de negociación e a intervención da administración, "que non pode seguir ignorando a todo un sector e manténdoo desinformado". A este respecto, subliñou que foi a patronal quen comunicou á representación social a renuncia de seis contratos, que presuntamente a Xunta volverá licitar. "Pero non sabemos se isto é certo. O que pedimos é que nos confirme se isto é verdade".
Medidas laborais e de mellora do servizo
Sobre a plataforma sindical para o novo convenio, Xesús Pastoriza sinalou que se recollen medidas estritamente laborais e económicas (como subas salariais e a terceira paga extraordinaria), máis tamén contempla melloras en materia prevención de riscos e saúde laboral que redundan directamente na prestación do servizo.
Así expuxo o exemplo das cadeiras de rodas mecánicas para acceder ás vivendas sen ascensor das que carecen a maioría das ambulancias, a falta de padioleiro/a no transporte programado, a limpeza da roupa de traballo (que a lei impide que se faga na casa por cuestións de hixiene pública, pero da que as empresas non se encargan) ou a despreocupación por parte das empresas na conservación de materiais e medios de traballo nun sector tan sensíbel como este.
O sector de ambulancias da área de Santiago mobilízase en demanda da negociación do convenio colectivo
Pídenlle á Xunta que informe sobre as renuncias ao concurso do 061
Delegados/as do sector de ambulancias da área sanitaria de Santiago concentráronse esta mañá na praza do Obradoiro e despregaron un enorme cartaz sob o lema “Ambulancias en loita” para reclamar que se negocie o convenio colectivo, caducado desde hai dous anos, e exixir á Xunta de Galiza toda a información relativa ás renuncias das empresas ao concurso do 061.
Os traballadores/as de ambulancias da área sanitaria de Compostela denuncian a “situación de abandono e a desidia” na que se move un servizo público como este. Consideran que unha mostra do desprezo polo seu traballo é que “ao mesmo tempo que temos o convenio colectivo caducado desde hai máis de dous anos as empresas pretendan un descolgue salarial de até o 25% do seu salario e condicions laborais”.
A isto, o responsábel do sector de Transporte da FGAMT-CIG engade que hai empresas –como Ambuibérica e Ambulancias Casablanca, nesta área sanitaria- que anunciaron a renuncia ás concesións alegando que non lles sae rendíbel precisamente porque as e os traballadores exixen o cumprimento do convenio. Fronte a isto lembra que “esas mesmas empresas gañaron os concursos públicos rebaixando a oferta económica nun 7% e que agora pretenden que sexa o personal quen asuma esa perda”.
“Todo isto colócanos nunha situación de incerteza e precariedade e supón ademais unha perda de calidade no servizo ao non atenderse desde as empresas a limpeza e desinfección das bases, ambulancias e uniformes ou a mellora e conservación de materiais e medios de traballo nun sector tan sensíbel como este”, alertan as traballadoras e traballadores do sector.
Información da Xunta de Galiza
Pavón acusou á consellaría de Sanidade e ao 061 de “mirar para outro lado” diante deste panorama, “como se non fora con eles” e responsabilizou á administración de entregar os concursos, hai dous anos, a ofertas que, “claramente non cubrían os gastos e agora queren que sexan as traballadoras e traballadores quen os paguen dos seus salarios. Néganse a recibirnos e son os verdadeiros responsábeis desta situación de abandono que denunciamos”.
Por iso esta mañá exixiron respecto polo seu traballo, información inmediata e transparente do proceso de renuncia dos lotes de ambulancias, a retirada dos procesos de descolgue salarial e a sinatura inmediata do convenio colectivo do sector.
O Sergas acepta crear unha comisión técnica para abordar a situación do persoal dos PAC
A CIG agarda que sexa operativa e que a Consellaría de Sanidade resposte a cada unha das demandas
Persoal dos Puntos de Atención Continuada e as organizacións sindicais con presenza na mesa sectorial do Sergas fixeron esta mañá entrega de máis de 700 sinaturas en denuncia das condicións de traballo que padece o colectivo que traballa nestes centros de saúde e que repercuten negativamente na asistencia. Coincidindo co acto traballadores e traballadoras concentráronse diante do Sergas para demandar a constitución dunha comisión técnica da mesa sectorial para abordar as súas demandas.
Foi necesaria esta mobilización para que as/os representantes deste colectivo e das organizacións sindicais foran recibidos por unha subdirectora de Recursos Humanos do Sergas que confirmou que se incorporará na Orde do Día da mesa sectorial a constitución desa comisión técnica.
A este respecto, a secretaria nacional de CIG-Saúde, María Xosé Abuín, lembrou que a inclusión deste punto da Orde do Día foi solicitada polas/os representantes da central sindical en reiteradas ocasións pero “a administración fixo caso omiso até que se celebrou esta concentración”.
Abuín agarda que esta comisión técnica sexa operativa e que “en cada unha das reunións que teñamos o Sergas dea resposta ás cuestións que se vaian abordando”.
Empeoramento das condicións
As traballadoras e traballadores que prestan asistencia de xeito eventual, fixo ou interino nos Puntos de Atención Continuada (PAC destinados a urxencias extrahospitalarias) no Sergas denuncian o empeoramento das condicións nos últimos anos, tanto den recursos humanos e materiais como en retribucións e presión asistencial, nomeadamente desde a creación das Estruturas Organizativas de Xestión Integrada (EOXI).
Entre outras cuestións demandan equipos completos medico/a-enfermeiro/a en todos os PAC: entende que “a atención a emerxencias sen persoal non é aceptable nun país desenvolvido”. Responsabilizan ademais, desta asistencia de baixa calidade á mala planificación por parte das EOXI.
Xunto a isto exixen respecto aos tempos de traballo do persoal conforme as directivas europeas que “están para garantir unha atención eficiente por persoal descansado en beneficio dos doentes”. Consideran que isto debe ser independente de ter un contrato fixo ou traballo fraccionado e que “o fraccionamento dos contratos non pode empregarse para non cumprir cos descansos”.
Listas de obxectivos
Tamén entenden que calquera avaliación de ‘derivación hospitalaria’ debe ser eliminada das listas de obxectivos, xa que “as derivacións non son opcionais, seguen criterios médicos”.
Reclaman ademais criterios obxectivos para a dotación de persoal nos PACs en base á carga asistencial, dispersión, distribución etaria, distancia ao hospital e número de mobilizacións polo 061, para garantir o dereito a asistencia.
Complementos, ITs e permisos
O persoal dos Puntos de Atención Continuada exixe o pago do 100% dos complementos de nocturnidade e festividade desde este momento e con carácter retroactivo desde 2010; que non se aumente a xornada laboral efectiva das 1.451 horas actuais. “Calquera exceso de xornada debe ser voluntario, incentivado e por tramos. Empeorar as condicións laborais aumentará as fugas de persoal a outras áreas e servizos e empeorarán a asistencia”, afirman.
Demandan o cómputo axeitado das Incapacidades Temporais e permisos retribuídos e que se contabilice como xornada laboral a asistencia a calquera reunión convocada desde as xerencias ademais de que as dietas dos domingos e festivos sexan aboadas pola comida e pola cea.
Tamén demandan a elaboración dos calendarios de quendas dando prioridade ao persoal propio de PAC, ocupando o persoal voluntario os ocos e a dotación de Equipos de Protección Individual a todo o persoal que traballa nestes centros, aínda que sexa persoal en formación ou ocasional. “Debe existir un circuíto de limpeza que evite ter que levar a roupa a lavar ao domicilio persoal”.
CIG-Saúde rexeita regulación das vacacións e dos cambios de quenda da EOXI de Vigo
“A falta de persoal e a política de contratacións dificultan unha atención sanitaria de calidade”
A federación de Saúde da CIG de Vigo vén de amosar o seu rexeitamento ás instrucións remitidas pola Xerencia da EOXI para regular as vacacións do ano 2018 e os cambios de quenda de traballo ao entender que establece limitacións e recortes no período de vacacións, nas presenzas e nos servizos. Dende a central denuncian que a falta de persoal e a “nefasta” política de contratacións dificultan unha atención sanitaria de calidade.
Na CIG-Saúde consideran que as instrucións afectarán especialmente a determinadas categorías e ao ámbito de Atención Primaria, ao tempo que denuncian que limitan de xeito inxustificado os cambios de quenda, “que non deixa de ser un mecanismo utilizado para poder conciliar a vida laboral e familiar”.
Segundo critican, estes cambios son froito dunha situación insostíbel provocada pola actual Administración debido á súa política de precariedade laboral, “que incluso fai perigar o actual sistema público de saúde”.
En concreto, sinalan a falta de profesionais, “xunto cunha nefasta política de contratacións”, como os factores que dificultan a día de hoxe unha prestación sanitaria de calidade; xeran lista de espera na Atención Primaria por falta de cobertura de profesionais, e colapsos nos servizos de urxencias e nos hospitais; incrementan a precariedade laboral, xa que con menos profesionais hai que cubrir máis postos; e precarizan as condicións de traballo do persoal das listas de contratación.
Advirten que esta situación non fará máis que empeorar, especialmente nas categoría que se nutren dalgúns especialistas nos que o número de profesionais en formación é claramente inferior ás necesidades do sistema sanitario público, como pediatría e medicina de familia. “De non tomar medidas urxentes veranse gravemente afectadas as categorías de pediatría -tanto do hospital como de primaria- medicina de familia -en atención ordinaria e nos PAC- médicas/os de urxencias hospitalarias e médicas/os asistenciais do 061”.
Atrasar a idade de xubilación
Ademais, lembran que esta situación de falta de profesionais afecta tamén a enfermaría, “onde xa temos problemas para cubrir as necesidades actuais”. E critican que as únicas medidas adoptadas son as de limitar o dereito de vacacións e de cambios de quenda -“prexudicando tanto ao persoal eventual como ao fixo, sen ofrecer alternativas que favorezan un emprego digno ao persoal do Sergas”- e incrementar a idade de xubilación para atrasar o problema.
“Non atopamos por ningures as medidas que se deberían estar tomando se realmente se quixera facer fronte a esta situación crítica para a sanidade pública, como potenciar as capacidades formativas de profesionais, desde o pregrao, nas facultades, ao postgrao, coa formación de residentes; tamén coa creación de prazas interinas que poderían ser convocadas en oposicións, que terían un efecto chamada de profesionais; ou mellorando as condicións dos postos de traballo na nosa área sanitaria, para conseguir atraer profesionais, no canto do que está a suceder na actualidade, que moitos/as queren marchar”, rematan.
Ambuibérica e Ambulancias Casablanca renuncian ás concesións do servizo en Santiago e no Barbanza
O sector mobilizarase para que se negocie o novo convenio e para exixir información da Xunta e do 061
Delegados e delegadas das bases de ambulancias da Área sanitaria de Santiago compareceron esta mañá en rolda de prensa para demandar a negociación do convenio colectivo, caducado desde hai dous anos; alertar do inminente concurso para adxudicación de novos lotes pola renuncia presentada por Ambuibérica e Ambulancias Casablanca aos de Santiago e Barbanza; denunciar o incumprimento mesmo das condicións hixiénico sanitarias nos vehículos e denunciar tamén a posíbel perda da ambulancia de Rianxo e dunha ambulancia de noite en Arzúa.
As traballadoras e traballadores do sector de ambulancias loitaron durante ano e medio para conseguir que se cumprira o convenio colectivo, fundamentalmente no referido a salarios e condicións laborais. Cando por fin conseguiron que se respectaran salarios, horarios e demais, agora as empresas néganse a negociar o novo e ademais varias presentaron a renuncia a determinados lotes, que na Área sanitaria de Santiago se corresponden cos de Santiago e Barbanza.
A xustificación é unicamente económica e, segundo explicou o responsábel do sector de Transporte da CIG de Compostela, Inácio Pavón, isto débese precisamente a que esas mesmas empresas concursaron por debaixo –até nun 6,5%- do prezo que marcaba a propia Xunta de Galiza.
Segundo denunciou Pavón, “a súa pretensión era facer negocio e obter beneficios incumprindo as condicións do convenio e do propio servizo” e, de feito, as propias empresas intentaron responsabilizar a traballadores e traballadoras de non obtelos por ter estes reclamado cobrar as cantidades que lles correspondían legalmente.
Por iso solicitaron xuntanzas tanto coa consellaría de Sanidade como co 061: para coñecer as condicións que se establecerían no novo concurso e para advertir das deficiencias que hai actualmente para que se puideran solucionar. “Sabemos en que condicións está agora o servizo e non nos gustan, pero non sabemos en que condicións vai estar despois. Este é o momento de que se solucionen os problemas, xusto cando se vai sacar un novo concurso”, explicou o responsábel do sector de Transporte da CIG de Compostela.
Porén, non houbo resposta algunha por parte da administración, polo que nin teñen a confirmación oficial –si oficiosa, por parte das propias empresas solicitantes- de que se aceptara a renuncia a eses lotes, nin das condicións que se contemplarán nas novas plicas.
Entre mentres, as traballadoras e traballadores, reciben noticias, non confirmadas, de que nese novo concurso non se contemplaría a ambulancia de Rianxo, que presta servizo 12 horas, ou que a ambulancia de Arzúa pasaría de prestar servizo 24 horas ao día a só 12. Por iso exixiron información, non só para as veciñas e veciños das zonas afectadas, senón tamén para as traballadoras e traballadores.
Ambulancias lavadas nas rúas e uniformes nas casa
Entre as cuestións que incumpren as empresas apuntaron que os uniformes, que habería que desinfectar entre emerxencia e emerxencia pola posibilidade de que haxa infeccións, se lavan nas casas ou que as ambulancias, que terían que ser desinfectadas por unha empresa acreditada, se lavan nas rúas.
Isto ocorre porque as bases están ubicadas en pisos ou baixos de edificios normais que carecen de zonas de aparcamento reservadas e menos preparadas para realizar eses labores de limpeza.
A isto engadiron que “hai un volume altísimo de servizos e non hai posibilidade de facer limpeza e desinfección do vehículo como se debería” e cuestionaron que teñan que ser os propios traballadores e traballadoras quen faga eses labores. “Hai riscos biolóxicos e no hospital non son os médicos quen limpan despois dunha operación, porque hai uns protocolos específicos dunha operación a outra que seguir, por iso tería que ser feito por unha empresa especilizada”.
Esta situación está xa denunciada na Inspección de Traballo e dela teñen coñecemento tanto a a consellaría como o 061, pero “nunca tomaron cartas no asunto”.
Descolgue do convenio e rebaixa salarial do 25%
O delegado da CIG na base de Padrón, Ramón Núñez, denunciou que as empresas non só non queren negociar un novo convenio senón que mesmo solicitaron o descolgue do que foi aprobado hai seis anos e que está caducado desde hai dous. “Propoñen recortes en todos os aspectos do convenio no que xa incumpren respecto a uniformidade, limpeza, bases… Queren rebaixar un 25% os salarios e véndeno como unha forma de aforrar no servizo”.
Diante desta situación anunciaron que haberá mobilizacións para exixir información, a retirada dos descolgues salariais que solicitaron as empresas e a negociación do novo convenio que as empresas queren manter conxelado. Rexeitan calquera proposta que pretenda rebaixar salarios e que se lle dea solución a todos os incumprimentos denunciados.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!